Sakkutuuiarnernik sullissivik Nunatsinniittoq

Tarnip pissusaanik ilisimasallit suliffeqarnermullu siunnersortit Veterancenterimeersut danskit naalakkersuisuisa sakkutuuiarnernik nakkutilliinerannut atatillugu sapaatit-akunneranni matumani Nunatsinniipput.

Tikeraarnerat sakkutuuiarnerit Illersornissamut qullersaqarfimmit ikiorneqarlutillu tapersersorneqarnerisa Naalagaaffeqatigiinni nunani tamani ingerlanneqarnissaanik siunertaqarpoq. Oberstløjtnant Kristian Malver  Veterancenterimeersoq taama oqaluttuarpoq.

- Sakkutuuiarnerit aallaqqaammut naapikkusuppagut, paaserusullugu Veterancenterip sakkutuuiarnernut tapersersuinissamik neqeroorutaanik atuinissaannut aporfissaqarnersoq, oberstløjtnant Kristian Malver  Veterancenterimeersoq taama oqarpoq.

Nunatsinnut, kingusinnerusukkullu Savalimmiunut, tikeraarnermut atatillugu aamma workshopertitsisoqassaaq, Illersornissamut ministereqarfimmi, kommunini peqqinnissaqarfimmilu suliamut ilisimasallit nunani marlunni pineqartuni sakkutuuiarnerit atugaannik eqqartuissallutik.

- Sakkutuuiarnernik sullissinerup Kalaallit Nunaanni Savalimmiunilu najukkami pissutsinut naleqqussarlugu 2017-ip naanerani ingerlanneqalernissaa anguniagaavoq, Kristian Malver oqarpoq.

Tikeraarnermi ilaatigut sakkutuuiarnerit Savalimmiuni Nunatsinnilu najugallit qassiunersut, sutigut tapersersorneqarnersut kiisalu sakkutuuiarnerit qanigisaasalu attaveqaqatigiinnerisa qanoq nukittorsarneqarsinnaanera misissorneqassaaq.