Royal Greenlandip sulisumi meerai efterskolertittalerniarpai
Naliginnaavoq akuersaarneqarlunilu inuusuttut Danmarkimi efterskolersimasut taama periarfissaqarsimanngitsunut naleqqiullutik kingorna atuarfimmi ingerlalluarnerusartut.
Taamaattumik Royal Greenland neriuppoq sulisumi akissarsiakinnerusut meeraasa piginnaasaannik qaffassaaqataasinnaalluni, misilittakkanik kulturimillu nutaamik misigisaqartinnerisigut, unammilligassanut soorlu ilinniarnermut inersimasutullu inuunissamut sillimaniassammata, Royal Greenland allappoq.
- Naatsorsuutigaarput Danmarkimi ukiumut atuarfiusumut 2015-16-mut inuusuttut sisamat efterskoleriartissinnaallugit, sulisoqarnermut siunnersorti Ulla Skibsted oqarpoq.
Atuariartortitsinermut akiligassanut tapiinerup saniatigut, Royal Greenland aamma kaasarfimmiussaanut, atuariartornermullu atasumik aningaasartuutinut, kiisalu angerlarlutik juullisioriartornissaannut tapiisinnaassaaq.
Nunatta avataani inuuneq pillugu inuusuttut pisinnaasaat ilisimasaallu qaffassapput, aalisakkanillu suliffissuaq siunissami ilinniarluarsimasunik sulisoqalernissaminut qulakkerinneqataassalluni.
