Royal Greenland frankrigimiut iganerminni akugisartagaannik ujarlerput
Siuteroq, qallunaatut; Konksnegl, frankrigimiut iganerminni akugisartagaasa pingaarnerit ilagaat, Royal Greenlandilu, canadamkiut immikkut ilisimasallit ikiortigalugit, Paamiut avataanni siuterorniarlutik misiliinialerput.
Misiliummik siuterorniarneq Sioqqat avataanni 20-80 meteritut ititigisumi ingerlanneqassaaq. Tamaani 200-300 meteritut ititigisumi siuterorniarnissaq pilersaarutaaqqaarsimangaluartoq, 18m/s tikillugu avannertalerluni siuterorniarnissaq ajornarsimmat pilersaarutit allanngortittariaqarsimapput.
- Misiliilluni siuterorniarnermi pullatit atorneqarput, canadamiullu siunnersuinerisigut pullatit putui millisimallutigit. Taamaalilluni pisaqarluarnissarput ilimanarnerulerpoq. Eqaluit ilaat, Sauri, canadamiut neqitareqummassuk taakkua Islandimi pisiarinikuuagut, Siiva Amondsen oqarpoq.
Canadami siuterorniartoqarluartarpoq, ukiumullu 6.000 tonsit missaat pisarineqartarlutik.
-Sumiiffinni arfinilinni 32-ikkaanik pullasersorpugut, taamaalilluta 192-inik pullateqarluta. Sapaatip akunnerani misiliilluni siuterorniarnermi pisarisat tulaanneqarlutik uuttortarneqassapput. Siunissami siuterorniarneq imminut akilersinnaassanersoq tamatuma kingorna nalilersussavarput, Royal Greenlandimi aalisarnermut siunnersorti, misiliinermi pisortaasoq, Siiva Amondsen, oqarpoq.