RG 4 million koruunit naliginut akiliisussanngorlugu unnerluunneqarpoq
Nunatta Politeeqarfianit unnerluussissummi, KNR-ip pigilersimasaani atuarneqarsinnaavoq, kilisaat Akamalik Royal Greenlandimit pigineqartoq, unioqqutsitsilluni raajanik, 2 tons 765 kiilunillu Qeqertarsuup avannaata kitaani, 2012-mi oktobarip 21-anniit 30-ata tungaanut sinerissap qanittuani aalisarfimmi kilisassimasoq.
Nunatta Politeeqarfianit unnerluussut tamanna, Royal Greenlandimit aamma Aalisarnermut Piniarnermullu Naalakkersuisoqarfimmit Radioaviisimut uppernarsarneqarpoq.
Qeqertarsuulli avannamut kitaani sinerissamullu qanippallaami kilisassimaneq unioqqutitsinerusoq, politiinit Namminersorlutillu Oqartussanit nalilerneqartoq unnerluussummi atuarneqarsinnaavoq.
Kilisaatip Akamaliup sinerissamut qanippallaami aalisarnerminut atatillugu sumi aalisarsimanerminnut nalunaarsuineri aamma eqqunngitsuusut unnerluussummi atuarneqarsinnaavortaaq.
Unnerluussisunit Royal Greenlandimut akileqqusaq 2 million koruuninik annertussuseqartoq, aalisakkanik suliffeqarfissuarmit suli akilerneqanngilaq, tassa pisoq eqqartuussivitsigut aalajangigassanngorlugu suliarineqartussanngormat.
Pisoq pillugu Royal Greenlandip kilisaatinut piosrtaa, Jens Bisgaard KNR-imut ima oqarpoq.
- Politiit unnerluussipput. Royal Greenlandimilli isumaqarpugut unioqqutitsisoqarsimanngitsoq aamma pisoq annertunerusumik oqaaseqarfiginianngilarput suliaq ingerlanneqarmat, Jens Bisgaard KNR-imut oqarpoq.
Akiligassiissutigineqartut katillugit 6 million koruunit sinnilaarlugit saniatigut, kilisaammi Akamalimi naalagaq, Savalimmiormiuusoq 10.000 koruuninik akiliisussanngortinneqartussaasoq unnerluussisunit nalunaarutigineqarpoq.
