GE og KNAPK: Raajarniat aningaasatigut eqqorneqassasut
KNAPK-mit Sulisitsisullu Peqatigiiffiannit taama isumaqartoqarpoq.
- Massakkumut nalunaaruteqallattaarnerup kingunerereerpaa, ilaat, soorlu kilisaatinik aningaasaliiniartut, suliatik unitsikkallaramikkit, Sulisitsisut Peqatigiiffianni siunnersorti, Bent Sørensen, KNR-imut oqarpoq.
Raajartassiissutit nutaamik agguaanneqarsinnaaniassammata, maanna agguaanneqareersut uterteqqinniarlugit Naalakkersuisunit oqaatigineqareerpoq.
AAMMA ATUARUK KNAPK GE-lu raajat pillugit Naalakkersuisunut akerliliisut
Nalornisoqartillugu atorniarnissaq ajornarnerulissaaq
Raajarniallu aningaasaliisinnaanissaannut tamanna ajornarnerulersitsisinnaasoq, Grønlandsbankenimit isumaqartoqarpoq.
- Nalornineq aningaasaliiniartoqartillugu nalinginnaasumik ajoqutaasarpoq, Grønlandsbankenip pisortaa, Martin Kviesgaard oqarpoq.
Tamannalu raajarniat ilaannut akisunerulertitsisinnaavoq artornarnerulertitsillunilu, bankimi pisortaq oqarpoq.
- Allanullu ajornarluinnartitsilersinnaavoq. Inuit ataasiakkaat qanoq atugaqarnersut soorunami apeqqutaalissaaq, Martin Kviesgaard oqarpoq.
Taarsigassarsiniarnissamut naliliisoqaraangat piginnaasat, aningaasaatit aalisarnissamullu pisinnaatitaaffeqarneq apeqqutaatinneqartartut, Martin Kviesgaard nassuiaavoq.
AAMMA ATUARUK GE-p SIK-llu pisassiissutit sorsuutigigaat
Aningaasatigut nalornineq
Raajartassiissutillu utertinneqassappata raajarniat aningaasatigut eqqugaanissaat, KNAPK-p siulittaasuata, Henrik Sandgreenip ernummatigaa.
Assersuutigalugumi kilisaatisiniarluni bankimut taarsigassarsiniaraanni raajartassiissutit qularnaveeqqutitut atorneqarsinnaasut, Sandgreenip erseqqissaatigaa.
- Taakkualu peerneqassappata, taava aperisariaqalerpugut, kia qularnaveeqqusissagamigit, aamma kia akilissagamigit, pigisanngortinneqarsimasullu arsaarinnissutigineqarpata kia akilerniarpaa taannalu qanoq naleqassava?, KNAPK-p siulittaasua, Henrik Sandgreen, oqarpoq.