Politikki Inuussutissarsiutit KNR pillugu nutaarsiassat

RAL Naalakkersuisut siunnersuutaat pillugu: Unammillernartoqassaaq

Naalakkersuisut KNR ukiup tulliata aallartinneraniit ussassaarisinnaajunnaartissappassuk, suliffeqarfiit arlallit sunnerneqassapput. Royal Arctic Linelu sunnerneqartussanut ilaasoq, suliffeqarfiup attaveqaqatigiinnermut pisortaa Jakob Strøm oqarpoq.

Allattoq Ivik Kristiansen, Laura Aggernæs

maajip 07-at 2015 12:13

- Soorunami unammillernartoqassaaq, allaanerusumillu aaqqiissutissarsiortariaqassaagut. Ussassaarutit KNR aqqutigalugu ingerlateqqittakkatta ilaat sullitatsinnut paasissutissiissutaapput. Assersuutigalugu juullilernerani poortukkanik nassiussinissamut tunniussinissaq kingusinnerpaaq nalunaarutigisarparput. KNR-illu nuna tamakkerlugu aallakaatitsisarnera pissutigalugu, nalunaarutitta sullitatsinnut apuuttarnissaat qularnarneq-ajorput, Royal Artic Linemi attaveqaqatigiinnermut pisortaq Jakob Strøm oqarpoq.

KNR inuiaqatigiinnik kiffartuussissasoq, aviisillu nuna tamakkerlugu saqqummersartut ussassaarutinut atugaassasut, aningaasaqarnermut naalakkersuisoq Andreas Uldum KNR-imut ippassaq oqarpoq.

Aamma atuaruk Andreas Uldum: Biilimut ussassaarutip peerneratigut tamat oqartussaaqataanerat innarlerneqarnavianngilaq

Aviisitigulli ussassaarineq KNR-ikkullu ussassaarineq assigiinngitsuusut, Jakob Strøm isumaqarpoq.

- Aviisitigut ussassaarisareerpugut. KNR-ili siammasinnerusumik tusagassiisarmat nuna tamakkerlugu sullitatsinnut apuussisinnaanitta aarlerinannginnera immikkuullarissutigaa. Illoqarfiit ataasiakkaat radioini ussassaarusiortarniarutta suliaangaatsiaassaaq, Jakob Strøm oqarpoq.

Juullimi poortugassat kingusinaarlutik nassiunneqartarsinnaapput

Royal Arctic Line KNR aqqutigalugu ussassaarisinnaajunnaassappat, tamanna suliffeqarfimmut siunissami ungasinnerusumi sunniuteqarujussuarnissaa Jakob Strømip ilimaginngilaa.

Royal Arctic Linep sullitaminut nalunaarutai apuuffissaminnut piffissami sivikinnermi apuutinngitsooratarsinnaasassasut, Jakob Strøm oqarpoq.

- Assersuutigalugu juullimi poortugassat kingusinaarlutik nassiunneqartarsinnaapput. Kisianni ajornerulernavianngilaq, Royal Arctic Linemi attaveqaqatigiinnermut pisortaq Jakob Strøm oqarpoq.