USA-p itigartitsinera: RAL-ip issittumi assartuussinissamut neqeroorutaa amigaatilik
Sisamanngornermi saqqummiunneqarpoq, amerikamiut suliffeqarfiutaata Schuyler Line Navigation Companyp, Pituffimmut Pituffimmiillu imaatigut assartuineq ukioq 2023-ip tungaanut atuuttussaq isumaqatigiissuteqarfigisimagaa.
Suliffeqarfik taanna 2017-mili imaatigut assartuinermik isumaqatigiissuteqarpoq, tamannalu sioqqullugu Royal Arctic Line ukiuni arlaqartuni sakkutooqarfimmut assartuisarpoq.
AAMMA ATUARUK Amerikamiut umiarsuaatileqatigiiffiat Pituffimmut isumaqatigiissuteqaqqittoq
Imaatigut assartuinissamik kingullermik suliariumannittusarsiortoqarmat Royal Arctic Line neqerooruteqaraluarpoq,
RAL-imiillu nalunaarutigineqarpoq, USA-imi illersornissamut ministereqarfiup Namminersorlutik oqartussat umiarsuaatileqatiffiat isumaqatigiissuteqarfigissallugu taamaatinneqartoq pissutsit marluk tunngavigalugit.
Royal Arctic Linep neqeroorutai USA-mut attuumassuteqanngillat. Naak tamanna USA-mi illersornissamut ministereqarfiup piumasaqaatigigaluaraa.
Royal Arctic Linep tusagassiuutinut nalunaaruteqarluni ilisimatitsissutigaa, isumaqatigiissuteqarnissamut periarfissat tamakkiisuunngimmata, amerikamiut imaatigut assartuinermi iluanaarutaasumik piumasaqaateqarnerat pissutaalluni.
Roayl Arctic Linep pisortaanerata Verner Hammekenip KNR-imut ilisimatitsissutigaa, Ralip neqeroorutaata amerikamiunit itigartitsissutigineqarnera umiarsuaatileqatigiiffiup aningaasaqarneranut ajornartorsiortitsilernavianngitsoq.
Umiarsuaatileqatigiiffimmi RAL-imi ukiuni tulliuttuni qulakkeerniarneqarpoq tulliani suliariumannittussarsiuussinissamut teknikimut upalungaarsimaneq piumasaqaatinullu uppernarsaanissaq taamaalilluni umiarsuaatileqatigiiffik Qaanaap eqqaa pillugu USA-mi oqartussaasunik suleqateqaqqissinnaaniassammat.
AAMMA ATUARUK Amerikamiut umiarsuaat Pituffimmut assartuussisussatut inatsimmi salliutinneqartut