Amerikamiut umiarsuaatileqatigiiffiat Pituffimmut isumaqatigiissuteqaqqittoq
Amerikamiut illersornissamut ministereqarfiata Danmarkip Pituffiullu akornanni imaatigut assartuinermut isumaqatigiissut amerikamiut umiarsuaatileqatigiiffiannut tunniuppaa.
Nunanut allanut tunngasunut naalakkersuisup, Ane Lone Baggerip isumaqatigiissut kalaallinut tunniunneqarani amerikamiut suliffeqarfiannut tunniunneqarnera uggorilluinnarpaa:
- Naalakkersuisut danskit nunanut allanut ministereqarfiat peqatigalugu amerikamiut nunatsinni sakkutooqarneranni kalaallinut pingaaruteqarnera pillugu USA-mut oqaloqatigiissutigineqaqqissaaq, Ane Lone Bagger oqarpoq.
Umiarsuaatileqatigiiffik, Schyuler Line Navigation Company LLC isumaqatigiissuteqaqqippoq. Namminersorlutik Oqartussat tusagassiuutinut taama paasissutissiipput.
Suliffeqarfiit pingasut neqoerooruteqartut
Amerikamiut umiarsuaatileqatigiiffiat maajimi 2017-imi isumaqatigiissuteqaqqaarpoq. Umiarsuaatileqatigiiffiullu Royal Arctic Linep isumaqatigiissutigisimasaa taamani tiguaa.
Royal Arctic Line isumaqatigiissummut 2017-imitullu neqerooruteqaqqikkaluarpoq.
AAMMA ATUARUK Kiffartuussinissamik isumaqatigiissuteqannginneq RAL-imi qissatigineqanngitsoq
Namminersorlutik Oqartussat ilisimatitsinerat naapertorlugu amerikamiut illersornissamut ministereqarfiata imaatigut assartuisarnissamut isumaqatigiissuteqarnissaanut pingasunik neqeroortoqarsimanerarpaa. Maannalu isumaqatigiissut isumaqatigiissummit siullermit sivisunerusumik atuuttussaavoq, maannami isumaqatigiissut 2023-mi septembarip naanissaata tungaanut atuuttussaavoq.
Royal Arctic Linep isumaqatigiissut 2017-imi annaammagu Royal Arctic Linemi pisortap, Verner Hammekenip nunatta suliffinnik annaasaqannginnissaa nalilerpaa, imaatigummi angallassisarneq Royal Arctic Linep kaaviiaartitaata 1 procentiinnarimmagu.
