RAL-ip Danmarkimi ingerlatseqatigiiffiutini pingasut tuninialerai

RAL naapertorlugu Jyllandip avannaani illoqarfimmi maannakkut sulisorineqartut pisariaqartitanit amerlanerupput.

- Aalborgimi suliatta siunissami Aalborgimi ingerlanneqarnissaat siunertarinngilarput. Taamaammat Aalborgimi sulisunut 120-nut sunniuteqartussaassaaq.

Royal Arctic Linep pisortaanera Verner Hammeken taama oqarpoq, suliffeqarfiullu sulisunik pitsaasunik arlalinnik soraarsitsisariaqarnera ajuusaarutigaa.

- Taamatulli aalajangerneq pisariaqarpoq. Kalaallit Nunaat nunarsuup sinneranut saatsittariaqarparput, aamma Danmarkimi umiarsuavilimmut aallaavimmut pituttugaassanngilagut. Taamatullu alloriassagutta allanngortoqarnissaa piffiillu nutaat atuutilertussanngornerat takutittariaqarparput.

AAMMA ATUARUK Royal Arctic Linep siunnerfini allanngortippaa

Verner Hammekenip RAL-ip periusissiaa nutaaq innersuussutigaa, tassani pingaarnertut ingerlatap, Nunatsinnit Nunatsinnullu aammalu Nunatsinni containerinik assartuussineq siunissami aallunnerunissaa pineqarmat.  

- Tamatuma kingunerissavaa Danmarkimi ingerlatseqatigiiffiutitta Nunatsinnut assartuussinermut attuumassuteqanngitsut pingasut tuninissaat. Arctic Base Supply Esbjergimiittoq aamma pigaarput, suliffeqarfilli taanna uuliasiornermut attuumassuteqarpoq uulialu nappartamut 48 dollarseqartillugu suliffeqarfik taanna piffissatorfigissanngilarput, Verner Hammeken KNR-imut taama oqarpoq.

RAL-imi aaqqissuusseqqinneq aningaasalersuinerit annertuut arlallit kingunerisaannik aningaasanik aallerfiussaaq.