RAL ajornartorsiormat Pisiffik nioqqutissanik eqqaasariaqartarsimavoq

Royal Arctic Linemi teknikkikkut atortorissaarutinik nutaanik atuutilertitsineq sulinermillu aaqqissuusseqqinneq ajornartorsiortitsipput.

Containerit 88-it sapaatit akunnerini 26-mi 27-milu usineqanngitsuunngikkunik sumiiffinnut kukkusunut niuneqarsimasut Royal Arctic Line nittartakkamini allappoq.

Taamaattoqarneralu Pisiffimmut eqquisoq, Pisiffimmut nioqqutissarsiniartartoq, Niels Erik Petersen oqarpoq.

- Malugisimavarput, ilaatigut containerit illoqarfinnut kukkusunut assartorneqartarneri, ilaatigullu containerit tammartut, periarfeerunneqartut, kingusinnerusukkullu nassaarineqaqqillutik, Niels Erik Petersen oqarpoq, ilanngullugulu oqarluni, containerit piffissaq eqqorlugu apuutinngikkaangata Pisiffik nioqqutissanik eqqaasariaqartartoq.

AAMMA ATUARUK RAL-ip kukkuluttorneranik Pilersuisoq eqqugaaqqasoq

- Ilaatigut nioqqutissarpaalussuarnik igitsisariaqartarsimavugut. Ilaatigut ullukitsut eqqaannartariaqarsimavagut, ullui qaangiutereersut nioqqutigeqqusaaneq ajoratsigit, Niels Erik Petersen oqarpoq.

Aamma pisiniartartut eqqugaapput.

AAMMA ATUARUK RAL-ip assartuinini ajornartorsiutigigaa

- Nioqqutissat tikinngikkaangata, imaluunniit piginngikkaangatsigit, pisisartugut amigaateqartarnerat kingunerisarpaa, Pisiffimmut nioqqutissarsiniartartoq, Niels Erik Petersen taama oqarpoq.

Assartuinermut kukkussutit aamma Pilersuisumut ajornartorsiortitsisut, KNI-mit oqarput.

Kukkussutit sapaatit akunneri tallimat arfineq-marlulluunniit ingerlanerini iluarsiivigineqarnissaat naatsorsuutigigitsik Royal Arctic Line-miit allapput.