Disko Line: Qulimiiguulinnik piareersimasuuteqassaagut
Umiarsuit qulimiguulinnut taarsiullugit Kujataani angallassinermi siunissami ilaatigut atorneqalernissaat, Kujataani innuttaasunit politikeriniillu apeqquserneqarpoq. Kiffartuussinissamillu isumaqatigiissutit nutaat atuutilerpata tamanna piviusunngussaaq.
Sikorsuaqartilluguli umiarsuit angalasinnaassusiat killeqartoq ilaatigut ernummatigineqarpoq. Sikorsuaqartilluguli qulimiguulinnut aningaasaliisinnaanini Disko Line A/S-ip, kiffartuussinissamik isumaqatigiissummik atsioqataaffigineqartup, maanna neriorsuutigaa:
- Sikorsuaqartillugu ajornartorsiortoqalissappata Disko Line qulimiguullit atorneqarsinnaanissannut aningaasaliisinnaavoq. Narsarsuup tungaanut aqqut ukiukkut sikunerani ajornarsippat qulimiguullit amerlanerusut atorneqarsinnaassapput, Disko Line A/S tusagassiuutinut nalunaarummi taama allappoq.
Umiarsuit qulimiguullillu suut Disko Line A/S-ip Kujataani atornerai, nittartakkatsinni KNR.gl-imi takuneqarsinnaapput.
Disko Line A/S Qaqortumi innuttaasunik oktobarip qaammataani ataatsimiititsiniarpoq, angallannermut pilersaarutit akillu tassani saqqummiunneqassallutik.
Aamma atuaruk Kiffartuussinissamik isumaqatigiissutissanut Qaqortumi akerliussutsimik takutitsilersut
Disko Linep nalunaarutaani kujataani angallassinermi angallatiginiagai ilaatigut takuneqarsinaapput, tassaappullu:
Bell 212 qulimiguulik qulingiluanik ilaasoqarsinnaasoq
AS350 qulimiguulik (pisariaqartitsinermi atorneqartussaq) tallimanik ilaasoqarsinaasoq
Targa 37-it angallatit marluk ataaseq 12-inik ilaasoqarsinnaasoq
Aviaq Ittuk umiarsuaq 36-inik ilaasoqarsinnaasoq
Disko Line Qaqortumi oktoberimi innuttaasunik ataatsimiisitsiniarluni, ilaatigut akit pilersaarutillu saqqimmiunniarlugit pilersaarusiuleruttorpoq.
Aamma atuaruk Immikkoortortaqarfik: Angallassineq pitsaanerulissaaq