Kiffartuussinissamik isumaqatigiissutissanut Qaqortumi akerliussutsimik takutitsilersut

Kiffartuussinissamik isumaqatigiissutinut nutaanut Qaqortumi aqagu marlunngornermi akerliussutsimik takutitsisoqassaaq. Akerliussutsimik takutitsinermikkut angallannermut naalakkersuisumit Knud Kristiansenimit oqaloqatigineqassallutik aaqqissuisut neriuutigaat.
Arkiv Assi © : KNR
Allattoq Kenneth Elkjær
septembarip 19-at 2016 12:56
Nutserisoq Simon Uldum -

Monica Dorph marlunngornermi akerliussutsimik takutitsinermik aaqqissuisut ilagivaat. Taassuma nutaanik kiffartuussinissamik isumaqatigiissuteqartoqarneratigut angallassinerup siunissami Air Greenlandip qulimiguuliutaanik ingerlanneqarani Disko Linep umiarsuaataanik ingerlanneqartalernissaa naammaginartinngilluinnarpaa.  

- Naammaleqaaq. Kiffartuussinissamik isumaqatigiissutit nutaat pissutigalugit Kujataani angallanneq ajorseriassaaq, Monica Dorph, Kommuneqarfik Sermersuumi kommunalbestyrelsimut ilaasortaasimasoq taama nassuiaavoq. 

Aamma atuaruk Innuttaasut kiffartuussinissamik isumaqatigiissutinut akerliullutik iliuuseqalersut

Akerliussutsimik takutitsinissamut peqataaniarlutik Facebookikkut nalunaarsimasut maannamut amerlagisassaanngillat, Qaqortumili torvimi akerliussutsimik takutitsineq aqagu nal. 16.30 aallartippat ikinnerpaamik 100-t peqataanissaat aaqqissuisunit neriuutigineqarpoq.

- Neriuppunga amerlanerpaat peqataassasut, pisariaqartippagut, Monica Dorph taama oqarpoq.
Kiffartuussinissamik isumaqatigiissutit atsioqatigiissutigineqareerput, allanngortinneqarnissaallu ilimanaateqarpallaarani. Tamannali akerliussutsimik takutitsinerup siunertarinngilaa:

- Angallannermut naalakkersuisup (Knud Kristiansenip, aaqq.) Kujataanukarluni sooq Disko Linemik toqqaasimanerluni nassuiaateqarnissaa anguniagaraarput. Tassa anguniagarput, Monica Dorph taama oqarpoq.