Kiffartuussinissamut isumaqatigiissut Qulakkeerininnernut qulimiguullillu amerlanerusut
Taakkua qulimiguullit amerlanerusunik angallassisarnissaannik aamma angalatilluni ilaaffigisassamut anngutinnginngitsooraanni imaluunniit nammineq pisuussutiginngisamik angalanerup unitsinneqartariaqarnermi annaasaqarnermi qulakkeerinninnernut atorneqassapput.
Aningaasaqarnermut inatsimmut 2017-mut atuuttussami immikkut ittumik 22,2 million kr-nik aningaasaliisoqarpoq taakkua ukiuni tulliuttuni sisamani ilaasunik angallassilluni kiffartuussinermut isumaqatigiissutinut oqallisaaqisunut pitsanngoriaateqarnissaannut atorneqassapput.
Aamma atuaruk Martha Lund Olsen kiffartuussinissamik isumaqatigiissutit pillugit saqqummiussivoq
Ilaatigut angalanermi nammineq pisuussutiginngisamik unitsinneqartariaqarnermi qulakkeerinninnernut atorneqassapput, tassalu unnuinermi inissaqarnermut nerisaqarnermullu atorneqartussat, tassani Kujataani, Avannaani Tunumilu pineqarput.
Tapiliussatut isumaqatigiissutit
Attaveqatigiinnermut Naalakkersuisup ilaasunik angallassinermi kiffartuussinermut isumaqatigiissumi tapiliussat imatut agguataarpai:
| Tapiliuussutut isumaqatigiissutit | mio.kr. |
| Ukiuunerani qulimiguullit ilaneri | 9,1 |
| Bilitsinut annaasanut, inissineqarnermut nerisaqarnermullu qularnaveeqqusiineq |
9,0
|
| Bilitsit akiineq appaaneq | 3.6 |
| Billitsinik inniminniisarnermut nittartakkakkut iserfissaq | 0,5 |
| Katillutik | 22,2 |
Attaveqatigiinnernut Naalakkersuisup Martha Lund Olsenip kiffartuussinissamut isumaqatigiissutit pitsanngoriaatai ataasinngornermi ullaap tungaani tusagassiortuni katersortitsinermi saqqummiuppai.
Qeqertarsuup tunuani qulimiguullip angalasarnerata qaammammik ataatsimik sivitsorneqarneranut immikkut aningaasaliisoqarpoq.
Kujataanni qulimiguut Bell 212-it marluk pingasunik inuttaqartut atorneqalissapput.
Aamma atuaruk Qulimiiguulinnik piareersimasuuteqassaagut
Qeqertarsuup tunuani qulimiguulimmik assartuussinermi bilitsinut akigititaasut agguaqatigiissillugit procentinik 30-nik appartinneqarput, aama Qaqortumiit Narsarsuarmut angalaneq 1061 kr-nut appartinneqarpoq.
Million koruunit affaat, angalanissamut inniminniinermut atorneqartartussamut nittartakkamut atorneqassapput.
Kiffartuussinissamik isumaqatigiissutinut tunngatillugu pisut
Ilaasunik angallassinermut kiffartuussinissamik isumaqatigiissutit nutaat septembarip 13-iani piareerneqarput. Ingerlaannarli sakkortuumik isornartorsiorneqalerput. Air Greenland, Disko Line aamma Norlandair isumaqatigiissuteqarfigineqarput.
Air Greenlandip kiffartuussinissamik isumaqatigiissutit nutaat pissutigalugit sulisut 45-t soraarsinneqassasut septembarip 14-iani nalunaarutigaa. Disko Line A/S Kujataani angallassisussanngorpoq, timmisartuussinerlu atorunnaarlugu imaatigut angallassineq atorneqarnerulissaaq.
Kiffartuussinissamik isumaqatigiissutit nutaat suli atsioqatigiissutigineqarsimanngitsut septembarip 29-ani tusarliunneqarpoq. Nuuk TV-p tamanna saqqummiuppaa.
Taamani angallannermut naalakkersuisuusoq Knud Kristiansen kiffartuussinissamik isumaqatigiissutit assortuussutaasut pillugit Aningaasaqarnermut ataatsimiititaliamit septembarip 30-ani nukingertumik isumasioqatigiinnissamut aggersarneqarpoq.
Naalakkersuisut siulittaasuata Kim Kielsenip kiffartuussinissamik isumaqatigiisutit nutaat oktobarip 13-iani isornartorsiorpai. Siumup siulittaasuatut atsiorluni tusagassiorfinnut nalunaaruteqarluni taamaaliorpoq.
Kim Kielsenip Atassut aamma Demokraatit oktobarip 31-ani naalakkersuisoqatigiunnaarpai. Aqqaluaq B. Egede aningaasaqarnermut naalakkersuisunngorpoq kiffartuussinissamillu isumaqatigiissutit pitsanngorsarnissaannut 'aningaasarpassuarnik' atuinissaminut piareersimalluni oqaatigaa.
Angallannermut naalakkersuisup Martha Lund Olsenip kiffartuussinissamik isumaqatigiissutit nutartikkat oktobarip 21-ani saqqummiuppai. Tusagassiortunik katersortitsilluni ilassutitut aningaasaliissutit 22 millionit koruuninik aningaasartaqartut saqqummiuppai, ilaatigut billetsit akikinnerulersinnissaannut, aallanngitsoornermut sillimasiinissamut timmisartuussinerillu amerlinissaannut atorneqartussat.
