Qujaukitsoq tunuartoq
Nal. 10.26 nutarterneqarpoq: Martha Lund Olsen taarserlugu Erik Jensen ullumi ataasinngornermi naalakkersuisunngortinneqassaaq. Kim Kielsenilli naalakkersuisuutitaanik taarsiinerit kisiartarissagunanngilaat. Vittus Qujaukitsormi naalakkersuisutut tunuarluni Facebookikkut nalunaaruteqarpoq.
- Naalakkersuisuunera tassunga killeqarpoq. Ullumi naalakkersuisutut tunualerpunga. Qujavunga tapersersuillutik sulininni tunuliaqutsiisimasunut. Nukittoqutigivassi assut. Qujanaq, naatsumik taama allappoq.
Naalakkersuisut siulittaasuat, Kim Kielsen, KNR-imit attaveqarfigigatsigu oqarpoq Inatsisartut nalunaaqutaq aqqanermut ataatsimiilerpata qanoq pisoqarnera paasinarsissasoq.
Qujaukitsup taamaalilluni Nunatsinni politikki qimakkallartussanngorpaa, Inatsisartunummi qinigaanngitsoornikuuvoq. Inatsisartunut 2014-imi qinersisoqarmat 87-iinnarnit taaguunneqarpoq, taamaalillunilu Inatsisartunut qinigaanngitsoorpoq aammalu sinniisussanngortinneqarani.
Vittus Qujaukitsoq naalakkersuisuunermini nunatta avataani arlarleriarluni maluginiarneqartarpoq. Pingaartumik aviisimit Politikenimit siorna decembarip qaammataani uissuummissutigineqartumik apersorneqarnermini. Nunanut allanut naalakkersuisup aviisimut 'Danmarkip anneruniarnera aserorsaataalluinnartuusoq' oqaatiginikuuaa.
Aamma atuaruk Vittus: Danmarkip anneruniarnera aserorsaataalluinnarpoq
Qujaukitsup matumunnga atatillugu erseqqissaatigaa Nunatta kissaatai Danmarkimit naammassineqartalinngippata Nunarput Kunngeqarfimmit aniinnarsinnaasoq.
Taamatullu oqarnera Christiansborgimi paasiuminaatsinneqarpoq, partiimmi arlallit ministeriunerullu Lars Løkke Rasmussenip Qujaukitsup isornartorsiuinera isumaqatiginngilaat. Nunatsinni naalakkersuisoqatigiinni siulittaasup Sara Olsvigip (IA) aamma Kim Kielsenip (Siumut) naalakkersuisoqatertik isumaqatiginagu nalunaarput.
- Naalakkersuisuni oqaluuserineqarnikuunanilu aalajangiunneqarnikuunngilaq danskit naalakkersuisuinik isumaqatigiinngissuteqarnermut illuatungiliissutissatut Naalagaaffeqatigiinnermit avissaarnissamik oqariartuuteqartoqarsinnaasoq. Aamma taamatut siunertalimmik eqqartuisoqalernissaa naatsorsuutiginngilara, Kielsen taama nalunaaruteqarpoq.
Aamma atuaruk Kim Kielsenip Vittus Qujaukitsoq suli tatigigaa
Siumumili allanit nersualaarneqarpoq:
Aamma atuaruk Lars-Emilip Qujaukitsoq nersoraa
Aamma atuaruk Ilisimatooq: Siumumi avissaartuuttoqarpoq
Aamma atuaruk Vittus tulluusimaanngilaq
