Lars-Emilip Qujaukitsoq nersoraa
Vittus Qujaukitsup kunngeqarfimmit aninissamik Amerikamiullu Pituffimmit anisinnissaannik sioorasaarutai Naalakkersuisunit oqaluuserineqarnatillu akuerineqarsimanngitsut, Naalakkersuisut siulittaasuata Kim Kielsenip tusagassiuutinut ippassaq nalunaarutigaa.
Vittus Qujaukitsulli Danskit naalakkersuisuinut sakkortuumik isornartorsiuinera Siumumut ilaasortaqatiminit ilaasortaasimasumiillu nuiamasunit tapersersorneqarpoq.
KIISAMI. Naqinnerit angisuut atorlugit Siumumut siulittaasuusimasoq, Lars-Emil Johansen, Facebookkimi quppernimini 5000-inik kammalaateqarfigisamini Vittus Qujaukitsup danskit naalakkersuisuinut isornartorsiornera pillugu allappoq.
AAMMA ATUARUK Demokraatit Vittus tupaallaatigigaat
Vittus Qujaukitsoq danskit tusagassiuutaannut Politikenimut isornartorsiuinermi kingorna tusagassiuutinut Nunatsinneersunut Danmarkimeersunulluunniit oqaaseqarusunngilaq.
Nersorneqartoq
Siumut Naalakkersuisullu siulittaasuata Kim Kielsenip Vittus Qujaukitsup oqaasiinut isumaqataanani tusagassiuutinut nalunaarutigigaluaraa, Lars Emil Johansen nunanut allanut naalakkersuisumut tapersersuivoq:
- VITTU nersorpakkit taperserlutillu, Lars-Emil Johansen Facebookkikkut quppernimini allappoq, ilanngullugulu allalluni, Nunarput pineqartillugu nunanut allanut tunngasunut politikki naalakkersuisutta oqartussaasuuffigisariaqarnerannut isumaqataalluni.
- Danmarkip grundlovia najoqqutaralugu tamanna ajornartorsiutitaqarsimappat, tamanna qallunaat ajornartorsiutissaraat uaguunngitsoq, Johansen allappoq.
AAMMA ATUARUK Nunatta nunanut allanut politikkeqarnerunissaa Vittup kissaatigaa
Aamma Siumup Naalakkersuisullu siulittaasorisimasaat, Aleqa Hammond Vittus Qujaukitsumut Facebookkikkut tapersersuivoq.
Siumullu sinnerlugu Naalakkersuisunut ilaasortaq, Martha Lund Olsen assinganik iliorpoq.
- Torrallaanerpaavutit, aalassatsitsivutit Nunatta ineriartoqqinnissaa pillugu. Qujanaq pilluarillu, Martha Lund Olsen Facebookkikkut allappoq.
