Qimmeq aallaatissimagunartoq pillugu politiit suli saaffigineqanngitsut
Ippassaq marlunngornermi Qaqortumi najugaqarfiup Paormaliarfiup eqqaani aallaammik eqqarpalummik tusaannittoqarsimalluni politiinut nalunaartoqarpoq.
Tassani qimmeq ikilerneqarsimalluni tusiattoq naammattoorneqarsimavoq. Politiit najugaqarfimmut pigamik qimmeq timaata talerpiatigut ikilerneqarsimasoq siumorpaat. Politiit apuussimatsiartut qimmip ikilerneqarsimanini toqqutigaa. Aallaaneqarsimanera politiinit ilimagineqarpoq.
Kingorna politiit Qaqortumi innuttaasut pisumik ilisimannissinnaasut ornigullutik oqarasuaammulluunniit 70 11 22-mut attaveqaqqullugit qinnuigai.
Ullumikkulli pingasunngornermi takunnissimasinnaasunit ilisimannissinnaasunilluunniit tusagaqarsimanatik politiit KNR-imut ilisimatitsipput. Taamaammat innuttaasut ilisimannissinnaasut saaffiginneqqullugit qinnuigineqaqqipput.
Politiit aamma erseqqissaatigaat; aallaasit, qoorortuut assigisaallu illoqarfik 500 meterisut ungasitsigalugu aatsaat atorneqaqqusaasut. Tamannalu unioqqutikkaanni akiliisitaanermik arsaagaanermillu kinguneqarsinnaasoq.