Qaqqap qaartinneqarnissaa isumassarsiatsialaanngitsoq
Immikkut ilisimasallit nunanit assigiinngitsuneersut qaqqaq Nuugaatsiap eqqaaniittoq sisoorsimasoq pillugu isumasiorneqarsimapput. Ilisimatuullu naliliipput qaqqamik qaartitsinermik misilittagakinneq pissutaalluni nakkutigisaasumik qaartitsinissaq isumassarsiatsialaanngitsoq.
Pinngortitamut Naalakkersuisoqarfik GUES suleqatigalugu taama allappoq.
- Qaartitsinermi ilisimaneqanngitsumik naatsorsuutiginngisamillu sumiiffiit sanngeereersut sunnerneqarsinnaapput imaluunniit sanngiiffinnik nutaanik pinngortitsisoqarsinnaalluni. Taamaalilluni qaqqat immikkoortut nutaat arlallit qajannaakkunnaarsinneqarsinnaapput, nakkutigisamik sisoortitsinerup kingorna ukiuni arlalinni nikikkiartorfiulersinnaallutik. Taamaalilluni qaartitsinermi qaqqap qajannaassusia pitsaanerulersinnagu maanna pissusiusut ajornerulersinneqarsinnaapput, naalakkersuisoqarfik allapooq.
Taamaammat innuttaasut 190-t Illorsuineersut, Niaqornaneersut Nuugaatsiameersullu sivisuumik angerlarsinnaannginnissartik naatsorsuutigisariaqassavaat. Qaqqarmi pineqartoq misissorneqarallassaaq.
- Misissuinerit taakku ulloq unnuarlu ingerlanneqarput, aammalu misissuinerit inernerinik amerlanerusunik pissarsisoqariarpat taakku erngerlutik nalunaarutigineqassapput, naalakkersuisoqarfik ilisimatitsivoq.
Kalerrisaarinermut atorneqarsinnaasutut periarfissat misissorneqartut
PIffinni taakkunani upalungaarsimaniarnermut kalerrisaarinermut atorneqarsinnaasunik periarfissanik oqartussat misissuileruttorput:
- Kalerrisaarinermut atorneqarsinnaasut suut atorsinnaanerigut misissuleruttorpagut. Nunani arlariinni misilittakkat arlariipput. Ilaatigut SMS atorlugu kalerrisaaruteqarsinnaanissarput sulissutigaarput, tamannalu ulluni qaninnerni oqaaseqarfigisinnaassallutigu neriuutigaarput, peqqinnissamut naalakkersuisoqarfiup pisortaa, upalungaarsimanermullu isumalioqatigiissitami ilaasortaq, Tine Pars KNR-imut oqarpoq.
Kalerrisaarinermulli atorneqarsinnaasunik pilersitsineq nunaqarfimmiut nunaqarfimminnut angerlarsinnaanngorneranik isumaqarnersoq suli aalajangerneqanngilaq:
- Tamanna suli tikinngilarput, taamaammat kingusinnerusukkut taanna akissuteqarfigiumaarparput, Tina Pars oqarpoq.
Karrat Kangerluanni qaqqaq Niaqornani, Saattuni, Ukkusissani, Ikerasanni, Qaarsunni kiisalu Uummannami innuttaasunut ulorianaateqanngitsutut, GEUS-imit maanna nalilerneqarpoq.
Taamaammat Niaqornani innuttaasut Uummannamut qimagussortinneqarsimasut qanoq iliuuseqarfigineqassanersut Namminersorlutik Oqartussat Qaasuitsup Kommuniatalu ataatsimoorlutik isumaqatigiissuteqarfigissavaat.
