Qanga ilisimasat Issittumi Siunnersuisoqatigiinnit pingaartinneqarput
Issittumi Siunnersuisoqatigiit ataatsimiinnerat, Nunaviup illoqarfittut pingaarnersaanni, Yellowknifemi pisoq naammasseqammnerpoq.
Taamaalilluni maannamut siulittaasuusup, Leona Aglukkap siulittaasuunerani pingajussaa ataatsimiittoqareerluni. Ataatsimiinnermi pingaarnertut oqaluuserineqarluni qulequtsiunneqarpoq "Issittumi Inuit siuarsarnisaat ineriartortinneqarnissaallu".
Canadadmiunit pingaartinneqarput eqqarsartaatsikkut peqqissuunissap ineriartortinneqarnissaa, Inuit qangaaniilli ilisimasaasa atorluarneqarnerunissaat aamma aningaasarsiornermi akisussaassuseqartumik siuarsaanissaq.
Aningaasarsiornerup ineriartortinneqarnerunissaa pillugu suleqatigiissitaq septembarimli pilersinneqarpoq, taallugu Issittumi aningaasarsiorneq. Tassani sammineqassapput, suliffeqarfinnik pilersitsinermi piujuaannartitsineq aamma avatangiisinik mianerinninnerit aallaavigalugit aningaasarsiornissaq.
Issittumi siunnersuisoqatigiit ataatsimiinneranni aamma sammineqarpoq oqallisaallunilu issittut imartaanni angalannerup isumannaannerunissaa, tassani pineqarnerulluni umiarsuit takornariartaatit angalaarneranni isumannaallisaanerit pitsaanerusariaqarneri. Aamma oqallisaapput annaassiniartarnerit taamatullu imartanik mingutsitsisoqannginnissaa.
Issittumi Siunnersuisoqatigiit aataatsimiiginnanngillat. Peqataasunit takuniarneqarpoq illoqarfiup avataani indianerit Denet nunaqarfiat 200-it missaannik inuttussuseqartoq. Tassani naapinneqarpoq oqaloqatigineqarlunilu, Denet høvdingiat Bill Erasmus. Taassuma oqaluttuaraa qangaaniilli nunaqqatigiit ilisimasaat ilaatigut avatangiisit, uumasut naasullu qanoq atorneqartarnersut oqaluttuaralugu.
Issittumi Siunnersuisoqatigiit tulliani ataatsimiissapput Eqalunni, tamanna pissalluni aappaagu aprtilip 24-niit 25-iat ilanngullugu.