Qaleralittassat allanngussanngillat
Tunumi qaleralinniarttoqannginnissaanik inassuteqaat malinneqassanngilaq, Naalakkersuisut oqarnerattut, qanga pisartut tunngavigalugit siunnersuutigineqarmat, Kalaallit Nunaata aamma nammineerluni imartami tamaani TAC 13.000 tonsinut aalajangersassagaa. Island tamaani aamma qaleralittassaqarpoq aalisarfimmilu tassani oqartussaasut malinnaapput, nassuerutigaluguli ataatsimoorluni aalisagartassat isumatunerusumik ingerlatsivigineqarnissaat pisariaqartoq.
Tamanna allarpassuillu ersarissipput, aalisakkanut assigiinngitsunut tunngatillugu aappaagumut aalisagartassiissutissat aalajangersarneqarmata. Annerusumilli allannguuteqartoqarnavianngilaq.
Sinerissamut qanittumi avataasiortuniluunniit ukiormannatut saarullinniartoqannginnissaa, biologit innersuussutigeqqippaat. Avataasiorlutik aalisartunut ukiormannatut misileraalluni 5.000 tonsinik saarullittassiisoqarpoq.
Saarulliit suffinerisa nalaani illersorniarlugit, Tunumi taamaallaat ukiup affaani kingullermi saarullinniartoqarsinnaavoq. Tunumi saarulliit suffisarfianni pingaarnerpaami Kleine Bankemi ukioq kaajallallugu saarullinniartoqaqqusaassanngilaq. Taamaaliortoqarluni Pinngortitaleriffiup aamma Sulisitsisut Peqatigiiffiata innersuussuteqarnerisigut.
Biologit mianersoqqusigaluaqisut, 15.000 tonsinik aappaagu sinerissap qanittuani aalisartut saarullittassinneqassapput. Taamaalilluni pisassiissutigineqartut ukiormannamit 5.000 tonsinik amerleriarput. Taamatut pisassiinikkut saarulleqassutsimut tunngasunik paasissutissanik pissarsisoqarnissaa siunertarineqarpoq. Ilisimasat nutaat siunissami aalisarnerup pitsaanerusumik aaqqissuunneqarnissaanut tunngavigineqarsinnaanissaat,oqartussanit ilaatigut tunngavilersuutigineqarluni.
Linki ataaniittoq toorlugu aalisakkanuta assigiinngitsunut aappaagumut pisassiissutit takusinnaavatit.
