Qaasuitsup Kommuniani nutaamik pisortaanertaarput
Bogmesteri Ole Dorphip tusagassiuutinut nalunaarutigaa kommunalbestyrelsip sisamanngormat ataatsimiinnerminni Hans Eriksen atorfinitsissallugu aalajangiussimagaat.
Aamma atuaruk Qaasuitsumi pisortaaneq atorfimminit tunuarpoq
Hans Eriksen siornali augustimi pisortaanerugallartutut atorfeqareersoq atorfittaamini ingerlaannartumik sulilerpoq.
Kommunimi pisortaanerusarsimasut sivikitsuinnarmik issiasarsimapput, Lars Sandgreeni ukioq ataaseq inorlugu, Svend Hardenbergilu qaammatit ikitsuinnaat atorfeqarsimalluni.
2010-miilli qaasuitsup kommuniani atuarfeqarnermut ilinniartitaanermullu ingerlatsivimmi Hans Eriksen pisortaasimavoq. Taassuma siorna kommunimi kulturqarnermut ilinniartitaanermut pisortaasimavoq, sioqqullugulu Jørgen Brønlundip atuarfiani pisortatut atorfeqareersimalluni.
Isumalluarput
Illoqarfiit pingaarnersaata kommunerisaaniit naligiissaarinermut tunngatillugu aningaasarpassuarnik pissarsereeraluarluni qaasuitsup kommuniata karsiani aningaasakilliorfiusuarpoq. Borgmesterili isumaqarpoq Hans Eriksen tassaasoq kommuni ilorraap tungaanut saatinnissaanut sullissisinnaasoq.
- Kommunalbestyrelsip qularutiginngilaa, kommunalbestyrelsi kiisalu kommunip allaffissornikkut aqunnera eqqarsaatigalugit matumuuna qaffasissumik qular-naarneqartoq, aningaasanut missingersuusiat kiisalu aalajangikkat pillugit akisussaassuseqarluartumik suliarineqartarnerat naammassineqartassasoq, Ole Dorph taama allappoq nangillunilu.
- Hans Eriksenip sulissutigissavaa Ilulissani timmisartoqarfiup allineqarnissaanut tunngassuteqartoq salliutillugit isumagineqarnissaa, Naalakkersuisunut ingerlatitseqqinnissaq eqqarsaatigalugu, taamatuttaarlu kommunimi innuttaasut kittartuunneqarnerisa ineriartortitsivigeqqinnissaat eqqummaariffigineqassasoq kiisalu Qaasuitsup Kommuniani inuussutissarsiornikkut ineriartortitsineq aamma eqqummaariffigineqassalluni.
