Qaasuitsumi pisortaaneq atorfimminit tunuarpoq

Lars Sandgreenip soraarsitaanissaa piffissami sivisuumi pilersaarutigineqarsimasoq kommunalbestyrelsimut ilaasortat marluk KNR-imut sapaatit-akunnerata siuliani uppernarsarpaat. Borgmester Ole Dorphili oqaaseqarumanngilaq, suliap sulisunut ataasiakkaanut tunngasuunera pissutiginerarlugu.

Maanna atorfimmit soraarnertut taallugu saqqummiunneqarpoq.

- Kommunalbestyrelsi sinnerlugu nalunaarutigissavara, Qaasuitsup Kommuniani pisortaaneq Lars Sandgreen suliffimminit soraarniarluni nalunaaruteqarmat, tamannalu akuersaarsimavara, borgmesteri Siumumeersoq tusagassiorfinnut nalunaaruteqarluni taama allappoq.

Lars Sandgreen ukioq ataasiinnaq atorfeqareerluni soraarpoq, Qaasuitsup Kommuniatalu Kulturimut, Atuartitaanermut Sunngiffimmilu sammisassaqartitsinermut maannakkut pisortaasoq, Hans Eriksen, Qaasuitsup Kommuniani pisortaanertut ivertikkallarpaa.