Qaasuitsup Kommunia suleriaatsinik sukaterilerpoq

- Massakkut piviusunngortikkiartuaarneqartoq tassaavoq suliassat amerlanerpaartaat illoqarfinni naammassineqartarnissaat, Qaasuitsup Kommuniani borgmester Ole Dorph oqarpoq.

Nunatta avannaani kommunit arfineq-pingasut kattunneqarmata kommunip sullissinera pitsaavallaarunnaartoq, innuttaasunit isornartorsiutigineqarpoq.

- Qitiusumik aqunneqarneq annertooq pitsaaginngilarput, aqutsisut ungasippallaarput kiffartuunneqarnerlu pitsaanngilaq, Upernavimminngaanneersoq Aqqaluk Heilmann oqarpoq.

Aamma atuaruk Qulaarpaa Qaasuitsumi siuariartortoqarpoq

Sullissinerlu nunaqarfimmiunit aamma iluarineqanngilaq.

- Innuttaasut susassaqartunut attaveqarniarnerat ajorsivinnikuuvoq. Soorlu suna tamarmi matoqqasoq, Naajaani nunaqarfinni aqutsisuni ilaasortaq Regine Olsvig oqarpoq. 

Immikkoortortaqarfinnilu suliassat qitiusumik allaffeqarfimmut nassiunneqartarnerat peqqutaasoq, borgmester oqarpoq, erseqqissaatigalugulu suliat immikkut ilinniarsimasunit suliarineqartariaqartut taamaallaat qitiusumi allaffeqarfimmit suliarineqartassasut.

Tamanna isumaqarpoq suliat, suliffeqarnermut, isumaginninnermut teknikeqarnermullu tunngasut qaffasissumik ilinniagaqartumit toqqaannartumik nakkutigineqartariaqanngitsut, ilarpassui kommunip illoqarfiini ataasiakkaani naammassillugit suliarineqartalissasut. 

Taamaaliornikkut suliassat naammassilertorneqarnerusalissasut Ole Dorph oqarpoq. 

- Ukiut ingerlaneranni utoqqatsissutissanngorsimagunarpoq, illoqarfinni nunaqarfinnilu suliassat immaqa amerlanerpaartaat allaffitsinnut apuuttarnerat. Taamaattumik massakkut aaqqiiviginissaa kommunalbestyrelsimit aalajangiiffigineqareerpoq.

- Sulisooreersut pisinnaasaat qaffassarneratigut ajornartorsiut aaqqiivigineqarsinnaasoraara, Qaasuitsup Kommuniani borgmesteri Ole Dorph oqarpoq.