Qaasuitsup Kommunia sinneqartooruteqarluarpoq
- Aningaasatigut aqutsineq pitsaanerusimavoq, Qaasuitsup Kommuniani borgmesteri, Ole Dorph, iluarisimaartoq oqarpoq.
Kommuni 13 millioni koruuninik sinneqartooruteqassalluni missingersuusiorsimagaluarpoq, naatsorsuutilli inaarmata angusat pitsaanerungaartut erserput - tassalu sinneqartoorutit 37 millionit koruuniusut.
Qaasuitsup Kommuniata 2015-imi aningaasatigut sukannersumik aqutsinera iluatsisimasoq, borgmesteri oqarpoq.
- Kingumut qiviarutta, tassa allaffissornikkut, meeqqat atuarfiata tungaatigut kiisalu aamma isumaginninnerup tungaatigut ukiup siuliini missingersuutinik sippuillutik atuiffigineqartarsimapput. Taakkualu soorunami immikkut isiginiarsimavagut, Ole Dorph oqarpoq.
Aamma atuaruk Kommuninut tapiissutit agguaanneqarput
Kommuni isumaginninermi 3,6 millionit koruuninik taavalu kulturimut atuarfeqarnermullu 4,2 millionit koruuninik missingersuutinut sanilliullugu atuinikinneruvoq.
Taaasuma saniatigut akileraarutitigut isertitarissaarnerusimavoq, isertitanit aammalu pigineqatigiffinnit akileraarutitigut isertitat missingersuutinit 18 millionit koruuninik ameerlanerummata. tamannalu aalisarluarnermik pequteqarpoq.
- Inuutissarsiornikkut - aalisarnikkut, tunisassiornikkut allatigullu - ukiup matuma aallartinneraniit ulappuffiuvoq.
Aamma atuaruk Qaasuitsup Kommunia sukannersumik nakkutigisaalerpoq
Angusarisaarnerup malitsigisaanik Namminersorlutik Oqartussaniit nakkutigisaaneq unissasoq, borgmesteri neriuppoq.
- Nammienrsorluni Oqartussanut, kommunit nakkutilliisoqarfiannut, saaffiginnippugut oqarluta, arnertusisamik nakkutigisaanerput atorunnaarsikkusupparput.
Naak angusat ataatsimut isigalugit pitsaagaluartut, ajornartorsiuteqarpoq. Tassami innuttaasut akiitsui aatsaat taama amerlatigilerlutik 2015-imi 14 millionit koruunik missaannik ilammata, tassalu innuttaasut Qaasuitsup Kommunianut 200 millionit koruuninik akitsoqalerput.
Aamma atuaruk Ole Dorph: Qaasuitsup Kommunia sulisunik soraarsitsiortoqqissinnaavoq
- Qaasuitsup Kommuniani aningaasarsiorneq ukiuni kingullerni pitsanngoriartortaluartoq, aamma neriulluaraluarluta, takusinnaavarput, innuttaasut kommunimut akiitsui Qaasuitsup Kommuniali pilersineqarmat ukiumut 10 millionit koruunit missaannik qaffariartarsimasut, Ole Dorph oqarpoq.
Innutaasut akiitsui amerligaluttuinnarmata, kommuni aningaasaqarnermut immikkoortoqarfimmik atorfinnik marlunnik pilersitsisimavoq.
