Professorip aalisarneq pillugu inatsit tupigusuutigigaa
Aalisagartassiissutit allatut agguaanneqartalernissaat aalisarnermut naalakkersuisup Karl-Kristian Krusep kissaatigaa, taamaaliornikkut aalisagartassiissutit amerlanerusut ullumikkumut naleqqiullugu aalisartunut amerlanerusunut agguaanneqartussanngorlugit.
Aaqqissuusseqqinnermilu eqqarsaataasoq paasiuminartuusoq, aalisarnerup iluani aningaasarsiornermik immikkut ilisimasalik Esbjergimilu Syddansk Universitetimi professori, Niels Vestergaard, taama isumaqarpoq.
Siunnersuulli aamma tupigusuutigaa, aaqqissuusseqqittoqarneratigummi aalisarnerup sunniuteqarlualernissaa qulakkeerneqanngitsoq Naalakkersuisunit aamma nassuerutigineqarmat.
- Annertuupilussuarmik iliuuseqarneruvoq, aamma siunnersuutigineqartoq nalinginnaasuunngilaq, ima paasillugu, taamatut siunnersuuteqarnikkut inuussutissarsiuut sunniutikinnerulersinneqassasoq naalakkersuisunit ammasumik oqaatigineqarmat. Nalinginnaasumimmi inuussutissarsiutit pillugit taama politikkiliortoqarneq-ajorpoq, Niels Vestergaard DR-imut taama oqarpoq.
Nunani allani taamatut aaqqissuussiniartoqarsimanera, tassalu aalisagartassiissutit ingerlatseqatigiiffinnut amerlanerusunut agguarneqarnerat, innersuussutigaa. Misilittakkalli takutippaat taamatut aaqqissuussineq inuussutissarsiuummik pisariunerulersitsisimasoq iluanaarutigineqartartullu amerlisimanngitsut.
- Tamannaavorlu inatsisissatut siunnersuummi pineqartumi eqqunniarneqartoq. Nalinginnaasuunngilaq, Niels Vestergaard DR-imut taama oqarpoq.
AAMMA ATUARUK Aningaasanut inatsit ataatsimiititaliamut ingerlateqqinneqartoq
