Politiken: Nunasiaataasimanermik oqalunnerup Kalaallit Nunaat innarlerpaa
Danmarkip qanga nunasiaateqarsimaneranut oqaluttuarisaanerup puigutsaalineqarnissaa pillugu illorsuarmik taaguutilimmik, Kolonihistorisk Centerimik pilersitsisoqarnissaa maanna suliniutigineqarleruttorpoq.
Kalaallit Nunaalli nunasiaataasimasutut taassallugu illorsuarmullu pilersinneqartussamut tulluutinngitsoq, aviisip Politikenip nutaarsiassalerinermut pisortaanit, Bo Lidegaardimit pingaarnertut allaaserineqarpoq.
Taanna allappoq, Danmarkip Karibiap kitaani nunasiaateqarsimaneranut Kalaallit Nunaat tassunga assersuunneqarsinnaanngitsoq.
- Karibiap kitaani Danmarkip nunasiaateqarsimanera Kalaallit Nunannut assersuunneqarsinnaanngilaq, taamaattumik Kalaallit Nunaat nunasiaataasimasutut taaneqarsinnaanani. Eqqaamaneqartariaqarpormi Kalaallit Nunaat Danmarkip ilaattut 1953-imili isigineqalermat, tamatumalu kingorna nammisortunngortikkiartuaartinneqarsimalluni, Bo Lidegaard aviisimi Politikenimi pingaarnertut allaaserisaqarpoq.
Taanna amma allappoq, Kalaallit Nunaata nunasiaataasimaneranik oqalunnerit pilermatali isumaqartoqarsimammat, Danmarkip nunasiaateqarsimanermut qanga politikkia, Kalaallit Nunaata nammineerluni akisussaaffinnik tigusiniarneranut akornutaasimasoq.
- Kalaallit Nunaata ajornartorsiuteqarneranik oqaluttuat nunasiaateqarusunnermik pinngortinneqarsorineqarneri eqqortuunngilaq. Aamma sorpiaat ajornartorsiutasunut allaaviunersut paasiuminaatsinneqartarmat, Bo Lidegaard allappoq imalu nangilluni.
- Tamassuma pilersippaa, nunasiaateqarsimaneq nutaatullusooq isikkulerlugu eqqartorneqartalermat kalaallillu inuiaqatigiit pilliutigineqarsimasutut oqaatigineqartalerlutik, Bo Lidegaard allappoq imalu nangeqqilluni.
- Uangut kukkussuteqarsimavugut - ilissi tamanna akisussaaffigissanngilarsi, Bo Lidegaard allappoq.
Taanna aamma allappoq, sorsunnersuup aappaata kingorna Kalaallit Nunaata nutarterneqarnissaa Københavnimi Styrelsemit, tassa naalagarsuarnit kalaallinit taaneqartartunit, eqqarsaasersornerunngimmat kalaallilli namminneq politikeriisa tamanna piumasarisimagaat allalluni.
