Politiit Brugsenimut tillinniartoq saqqummiunniarlugu siorasaarisut
Marsip 26-iani angut kiinarpalerluni sulisut pingasut siorasaarpai 17.000 koruuninillu tillilluni. Paasiniaanerlu unittooqqasutut immat politiit sukannernerusumik iliuuseqarnialerput.
- Erseqqissaatigaara ujajaanerup nalaani Brugseneeqqami filmiliat pigigatsigit. Taavalu taanna ujajaasoq nalunaaruteqanngippat tusagassiutitigut taanna filmiliaq saqqummiunniarlugu.
- Una erseqqissaatigerusuppara, nalunngisat annikitsunnguugaluartulluunniit uagutsinnut pingaaruteqarsinnaasarmata. Taamaammat tusaamasaqartoqaruni imaluunniit nalunngisaqartoqaruni uagutsinnut nalunaaruteqarnissaq pisariaqartorujussuuvoq, Johan Davidsen, Qeqqata politiivini regionslederi, oqarpoq.
Ujajaasoq angutaavoq 175 centimeterit missaanni angissusilik, nerinnattoq, qaamasunik qorsorpaluaartunik isilik. Kiinni aappalungusersumik assiaqutsersimavaa, qernertumik jakkeqarluni, timersuutinik kamaasiaasanik "Nike”-inik ilisarnaatilinnik qarleqarluni aamma ”Nike”-nik meqqilinnik qernertunik skoqarluni. Kalaallisut Sisimiormiorpaluttumik oqaluppoq.
Aamma atuaruk Sisimiuni Politiit isiginnissimasunik oqaloqateqarusupput
Sillimaniarneq pitsanngorsartuaraat
Ukioq manna Brugsenip pisiniarfiutaani 14-eriaq tillinniartoqarpoq. Taakkunanilu arfineq-marluk Sisimiuni pillutik. Tillinniartoqarneri 100.000 koruunit angullugit aningaasartuutaasimapput.
- Tillinniartoqarsimatillugu pisiniarfitta qanoq isumannaatsiginera misissortarpavut, iserfiusimasullu matusarlugit. Matut igaluulluunnit aserorneqarsimasut ninngunerusunik taarsertarpavut. Massakkullu aamma taamaaliorpugut, Mark Kobberrød, Sisimiuni Brugsinimi pisiniarfiup pisortaa, oqarpoq.
Aamma atuaruk Brugseneeqqat ujajaaffigineqarnissamut sillimmasersortut
Sulisut toqumut siorasaarneqarsimasut inuup pissusaannik ilisimasalinnit ikiorneqartartut, Brugsenimi attaveqatigiinnermik suliaqartoq, Irene Jepson oqaluttuarpoq.
- Naalaaqqissaartarpagut qanoq oqaasissaqarnersut. Sulisutta iluamik oqaloqatigineqarnissat pingaatsittupilussuuarput.
Taassuma erseqqissarpaa sillimaniarneq pitsanngorsarneqartuartoq. Assersuutigalugu pisiniarfiit tamarmik filmiliutilersorneqarput. Ullormullu isertitat aningaasaasivinnut, sulisut ammarsinnaanngisaannut, nakkartinneqartarlutik.
