Polar Seafood angusaqarluartoq
- Ukioq taama pitsaatigisoq qaqutigoorluinnartuuvoq, Henrik Leth oqarpoq.
Polar Seafood siorna ingerlalluarpoq. Ukiumoortumik nalunaarusiaata takutippaa 335 millionit koruuninik isertitaqarsimasoq, taakkulu 2014-imut naleqqiullugit 100 millionit koruuninik amerlanerupput. Suliffeqarfissuullu aningaasanik taama amerlatigisunik isertitaqarsimanerata aalisarnerup iluani pitsaasunik periarfissaqarsimaneranik pissuteqarpoq.
- Raajanut, qaleralinnut assagiarsunnut nioqqutissaatitsinnullu allanut akit qaffasissimapput, Henrik Leth oqarpoq.
Qaqutigoortoq
Polar Seafoodimulli periarfissat siorna qaqutigoorluinnarsimammata, ukioq manna taama amerlatigisunik isertitaqarnissaq, siulersuisuni siulittaasup ilimaginngilaa.
- Ukioq manna taama isertitaqartiginissarput naatsorsuutigisinnaanngilarput, Henrik Leth oqarpoq.
Aningaasaliiffissat
Taamaattoq isertitarineqartut aningaasaliinissamut periarfissilluarput.
- Angallatinut, soorlu avaleraasartoorniutinut, 7 millionit koruunit tungaanut ukiuni kingullerni aningaasaleereerpugut. Aningaasat suliffeqarfitta aalajallisarnissaanut aamma atorneqassapput. Tamatumalu saniatigut sumi aningaasaliisinnaassanerluta misissussavarput, Henrik Leth oqarpoq.
Aamma piginneqataasunut nutaarsiassaalluarpoq. Taakkununngami katillugit 75 millionit koruunit tunniunneqassapput.
Malunnartoq
Suliffeqarfiulli ukiorissaarsimanera allanit aamma malugineqartoq, Hernik Lethip oqaatigaa.
- Akissarsianik amerlanerungaatsiartunik tunniussivugut, aamma aningaasanik amerlanernut tunisivigut. Taamaammat aalisarnerup iluani ingerlalluartoqarsimasoq malugineqarluarsinnaavoq. Aalisartugut isertitaqarluarput, inuiaqatigiinnullu aningaasaleeqataalluta, Henrik Leth oqarpoq.
Polar Seafoodip nammineq aningaasaatai 1.233 millionit koruuniupput, sulisorisallu ukiup siuliata ingerlanerani 97-inut amerlisimallutik.
