Pituffik pillugu misissuinerup tamakkiisumik saqqummiunneqannginnissaa Transparencyp akuerigaa
- Paasissutissat ilaat peqquteqavissumik saqqummiunneqarsinnaanngippata paasisinnaavarput, saqqummiunneqarsinnaasulli tamaasa saqqummiunneqassapput, Transparency Greenlandimi siulittaasoq Anita Hoffer oqarpoq.
Pituffimmi kiffartuussinissamik isumaqatigiissutip annaaneqarnera, Nunatsinni kiap akisussaaffigineraa paasiniarlugu eqqartuussissuserisup misissuinerani paasissutissat tamaasa inuiaqatigiinnut politikerinullu naalakkersuisuunngitsunut saqqummiunneqanngitsooratarsinnaapput.
Eqqartuussissuserisummi misissuinermini inerniliussaasa ilaat saqqummiunneqassappata sillimaniarnermut nunanullu allanut tunngasunik sulianut innarliisinnaanera Naalakkersuisut siulittaasuata Kim Kielsenip tunngavilersuutigaa, Anita Hofferillu tamanna paasisinnaavaa.
Aamma atuaruk Kielsen tusagassiortunit kimigiiserfigineqartoq
Inatsisartunut saqqummiunneqarnissaanik neriuuteqarneq
Taamaakkaluartoq tamanut ammasumik saqqummiutinngikkaluarlugu susassaqartunut saqqummiuteqquai.
- Inatsisartuni ilaasortat paasisaqarnissaminnut pissutissaqartut paasitinneqarnissaminnut piumasaqassasut neriuutigaara, Anita Hoffer oqarpoq, ilanngullugulu oqarluni, nalunaarusiaq tamanut saqqummiunneqassanngikkaluarpat Kim Kielsenimit atorluarneqarnissaa tatigiinnarneqartariaqartoq.
- Nalunaarusiaq tamakkerlugu saqqummersinneqarsinnaanngippat kukkusoqarsimaneranillu inerniliussaqarluni misissuinermut akisussaasup kukkunerit uteqattaannginnissai akisussaaffigissavai, Anita Hoffer oqarpoq.
Eqqartuussissuserisup suliaa apriilip aallaqqaataanni naammassisussaagaluartoq kinguaattoorneq pissutigalugu aatsaat juunimi naammassineqarnissaa naatsorsuutigineqarpoq.
Aamma atuaruk Aviisi: Namminersorlutik Oqartussat Pituffik pillugu misissuisussaat aajuna
