Politikki

PITUFFIK Aviisi: Namminersorlutik Oqartussat Pituffik pillugu misissuisussaat aajuna

Naalakkersuisut misissuititsinissamut suliakkiutaata oqaasertai aviisip AG-p pissarsiarisimavai. Greenland Contractorsip Pituffimmi sullissisussajunnaarnerata siornatigut Nammilersorlutik Oqartussani kikkut suliaqartarsimanerannik Ole Spiermann misissuissaaq.

Allattoq Jens Thorin

marsip 12-at 2015 04:33

Ole Spiermann eqqartuussissuserisuuvoq 2009-miillu eqqartuussissuserisoqatigiinni Bruun & Hjejlekkunni piginneqataasuulluni. Taanna sioqqullugu Københavnip Universitetiani nunat tamalaat akornanni inatsisilerinermut professoriuvoq.

Suliakkiissutip oqaasertaani, AG-p pissarsiarisaani ippassarlu saqqummiussaani, allassimavoq Namminersorlutik Oqartussat ataanni immikkoortoqarfiit oqartussaqarfiilluuniit sorliit suliamik suliarinneqataasimanersut, Ole Spiermannip qulaajassagaa.

Aamma Namminersorlutik Oqartussani kikkut suliami aalajangiisimanersut kikkullu iliuutsiminnut aalajangiinerminnulluunniit pisussaaffiligaasimanersut paasiniassavaa. Kiisalu aamma immikkoortoqarfiit oqartussaqarfiilluunnit taakkua pineqartut politikkikkut akisussaasunut paasissutissiisarsimanersut misissussallugu.

Aamma atuaruk Kielsen eqqartuussissuserisut suliaat pillugu: Aviisimi atuarsinnaavarsi

Namminersorlutik Oqartussani atorfillit qaffassissumi inissisimasut misissuinermi tunuliaqutaallutik ikiuutissapput, Ole Spiermannip tamaalilluni Namminersorlutik Oqartussani allagaatit, amerikamiut Exilisimit Pituffimmi sullinneqassallutik aalajangiinnginnerannut tunngasut tamaasa pissarsiarilertorsinnaaniarssammagit.

Aamma tunuliaqutaallutik ikiuuttut Ole Spiermann oqilisaatissavaat, taamaalilluni atorfillit apersorneqartussat pissarsiariuminartinnerussammagit.