Pisortap umiarsualivissaq qilanaaraa
Kangerlussuarmilu umiarsualiviliortoqassappat nunatsinni umiarsuarnut takornariartaatinut iluaqutaassasoq, World of Greenland Arctic Circlemi pisortaq Jørgen Larsen isumaqarpoq, nunaqarfimmilu talittarfittaarnissaq qilanaaraa.
- Umiarsualivittaarnissatsinnut qilanaarpugut, World of Greenland Arctic Circlemi pisortaq Jørgen Larsen KNR-imut oqarpoq.
Umiarsuarnut takornariartaatit Kangerlussuarmut Nunatsinnullu pingaaruteqarluinnarnerarpaa, Kangerlussuarmimi ilaasut niullutillu ikisarmata.
- Kangerlussuaq matuneqassappat umiarsuarsualiviup sananeqarnissaa soorunami pisariaqarunnaassaaq, matuneqassanersorli arlaatigut tusanngilarput, Jørgen Larsen oqarpoq, nangillunilu oqaatigigaa, Nuummi Ilulissanilu mittarfiit tallineqaraluarpataluunniit Kangerlussuarmi takornariaqarnerup ineriartortinneqartuarnissaa naatsorsuutaasoq, Jørgen Larsen oqarpoq.
Kangerlussuarmi silap unerisimasarnera, Nuummilu silap unammillernarsinnaasarnera tikkuarpaa, oqaatigalugulu kinguaattoornerit umiarsuarnit utaqqineqarsinnaaneq ajortut.
Ilulissanilu ukiup ilarujussuani iluliaqarluartarmat takornariartaatit tulannissaat ajornartarpoq.
- Taamaammat takornariartaaterpassuit ilaasutik Reykavikkimut paarlaakkiartorusunnerlulissagaat qularutiginngilara, taamalillutalu Nunatsinni umiarsuarnit takornariartaatinit aningaasarpassuit isertissinnaa-saraluagut annaassavagut, Jørgen Larsen, oqarpoq.