Pisiffik tuniniarneqassanngikkallarpoq

Aningaasaateqarfiup KFI-ip aaqqissugaanera Danmarkimuinnaq pisiniarfeqarfinnut atuummat Pissiffimmut piffissami sivisunerusumi piginneqataanissartik siunertarinngilaat.

Taamaattoq Pisiffiup ingerlanneqarnera ineriartuiffigeqataaniarpaat aningaasaliisussanik allanik pissarsinissamik tungaanut.

- KFI-mit Pisiffimmut ineriartortitseqataasinnasunik pitsaanerusunik aningaasaliisussanik piffissami kingusinnerusumi ujartuinissatsinnut soqutiginnippugut, KFI-mi siulersuisut siulittaasuata tullia Mikael Holm Johansen oqarpoq.

Aamma atuaruk Dagrofap Pisiffik tunigaa

Pisiniarfiutilinnut aningaasaateqarfiup, KFI-p Pisiffik Norgesgruppe peqatigalugu aappaagu januaarip aallaqqaataanit piginneqatigiilissapput. Taakkua katillugit 85,8 procentimik Pisiffimmut piginneqataalissallutik.

Aningaasaateqarfiup aaqqissuussaaneranut piginneqataasussanngornertik naapertuutinngimmat tuniniarneqarnissaa siunertarivaat.

KFI-p Pisiffimmut piffissami sivisunerusumi piginneqataaginnarnissaa aningaasaateqarfiup aaqqissugaaneranut naapertuutinngimmat siunertarinngilarput.

40-nik pisiniarfiuteqarpoq

Pisiffik Nunatsinni illoqarfinni arfiniliusuni 40-nik pisiniarfeqarpoq. 600-ujullu siunnerlugit sulisoqarluni.

Pisiffik nioqqutissanik milliardingajannik nalilinnik siorna tunisaqarpoq.  Naatsorsuutigineqarpoq ukioq manna aamma taamaattoqarnissaa.

Greenland Venturip Nunatsinni pisiniarfiutileqatigiit annersaat 14,2 procentinik aamma piginneqataaffigaa.

Aamma atuaruk Aningaasaateqarfiup Pisiffimmi piginneqataassutini tunerusukkai

Naak anigaasaateqarfiup Pisiffik piginneqataaffigissallugu siunertarinngikkaluarlugu siuarsaaffigeqataaniarpaa aningaasaliisussanik allanik nassaarnissami tungaanut.

- Pisiffik suliffeqarfik ingerlalluartuuvoq. Piginneqataasut allat peqatigalugit ineriartortitsinissaq qilanaaraarput. Neriuutingaarpullu Kalaallit Nunaanni pisiniarfiup ingerlalluarneranut tapertaasinnaajumaarluta, Mikael Holm Johansen KNR-imut taama oqarpoq.