Pinngitsaaliissummik misiligutissamik quisitsisoqartassanngilaq
KNR-ip sapaatit-akunnerata siuliani allaaserisaqarneranut atatillugu, ilinniartut akornanni hashimik atornerluisoqarnerata annertussusaanik misissuinissamut periarfissat, ilaatigut misiligutissamik quisitsisoqarsinnaanera, naalakkersuisup oqaaseqarfigaa.
Qooq akoqanngitsoq ilinniagaqalernissamut tunngaviussanngilaq
Nivi Olsenip ajuusaarnartuunerarpaa KNR-imi apersorneqarnermini nipeqartinniarneqarmat inuussutissarsiutinut ilinniarfinni tamani ilinniartuusut misissuiffigineqartalernissaat pisussaaffinngortinniaraa.
Aamma atuaruk Ikiaroornartut pillugit misissuineq inatsisitigut ajornannginnerulertikkusukkaa
Aamma atuaruk Ilinniartut quuisa misissorneqartalernissaat akerlerigaat
- Taamaattoqanngilarmi. Aamma siunertaanngilaq quumik misissuinermi qooq akoqanngitsoq ilinniagaqalernissamut tunngaviussasoq, qoorlu akulik itigartinneqarnissamut anisinneqarnissamulluunniit tunngaviussasoq. Pineqartoq tassaavoq atornerluinermik ajornartorsiuteqartut ingerlaqqikkusuttullu ikiorserneqartassasut, Nivi Olsen tusagassiorfinnut nalunaaruteqarluni taama nassuiaavoq.
Ilinniartut misiligutissamik tigusiffigineqarsinnaassapput
Taamaammat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik maanna inatsisiliornissamut piareersaataasumik suliamik aallartitsivoq, atornerluinermik ajornartorsiuteqartoqarnera pasitsaanneqarsimappat misiligutissamik ilinniartoq ilinniartulluunniit tigusiffigineqartalersinnaanerat pillugu.
Taamaaliornikkut pissutsit atuuttut qanorpiaq-innerat takulluarsinnaanngorumallugu, aalajangiinissanullu tunngavissat pitsaanerusut pigilerumallugit, ilinniagaqartut atornerluinermik ajornartorsiuteqartut ikiorsertarnissaannik ineriartortitsinissaq eqqarsaatigalugu.
- Soorunami uanga soqutigisarinngilara kinaluunniit nutaamik aallarteqqinniartoq, pereersunik qaangiilluni ingerlaqqikkusussappat akornusissallugu, Nivi Olsen taama oqarpoq.