76 milliardit koruunit. 

Danmarkip nunatsinnut tapiissutigisartagaasa 19-eriaataat, tassa aatsitassarsiortitseqatigiiffiup Energy Transition Mineralsip nunatsinni aatsitassarsioqqusaanngikkuni nunatsinnit Danmarkimiillu taarseeqqussutaat kisissaanngingajattut. 

Kuannersuit uani pineqarput, aatsitassarsiortitseqatigiiffiummi Kuannersuarni aatsitassarsioqqusaannginnini naammaginnginnamiuk akuerineqarnissi anguniarlugu isumaqatigiissaasarfimmi aalajangiititserusuppoq. 

Suliarli Danmarkimi isumaqatigiissaasarfimmi suliarineqassanersoq nalunarpoq. 

Aatsitassarsiortitseqatigiiffik naammagittaalliummik allagaqarpoq, taannalu Namminersorlutik Oqartussat danskillu naalakkersuisuisa januaarip arfineq-pingajuat tikitsinnaagu akissavaaat. Tamatumalu kingorna suliap isumaqatigiissaasartunut ingerlateqqinneqarnissaa aatsaat naliliivigineqassaaq. 

Ernumanngilaq

Taamaattorli Aatsitassarsiornermut naalakkersuisoq Naaja Nathanielsen IA-meersoq annilaangassutissaqannginnerarpoq. 

- Suliaq isumaqatigiissitsiniartarnermi eqqartuussivimmut suliassanngortinneqarsinnaanngitsoq, Naalakkersuisut isumaqarluinnarput, tusagassiutinut nalunaarummi taanna allappoq.

- Isumaqatigiissitsiniarnermi eqqartuussiviup suliami aalajangiinissami piginnaatinneqannginneranik isumaqarnerput allanngortinngilarput.

Allatut oqaatigalugu suliap isumaqatigiissaasartunut anngunnissaa Naaja Nathanielsenip aarleriginngilaa.

Suliarli australiamiut aatsitassarsiorfiannut 76 milliardit koruuninik taarsiinermik inerneqassappat kikkut akiliissappat?

Kalaallit Nunaata akilerumaarai, naalakkersuisoq naliliivoq

- Aatsitassanut immikkoortup tiguneqareernera pissutigalugu, Kalaallit Nunaanni Namminersorlutik Oqartussat kisimik taarsiisussaatitaanissaat pissusissamisuussaaq.

- Namminersorlutik Oqartussat qallunaallu naalagaaffiata suliami akuunnginnera piffissaq tamaat isumaqatigiissutigiuarpaat.

Taaarsiinissarli ilumut killifigineqarumaarnersoq, taanna naliliinngilaq.

- Uranimik inatsit malillugu aalajangernerit kingunerannik taarsiivigeqqunerit akuerineqarsinnaasariaqanngillat, Naaja Nathanielsen oqarpoq.

Piginneqatigiiffiup ajugaanissaa ilimaginngilluinnarpaa

Naaja Nathanielsenip parteeqataata avatangiisinut tunngasuni oqaaseqartartup Mariane Paviasenip oqasii assingupput.

- Tassami aningaasarparparparujussuupput aamma minnerpaamilluunniit takorloorsinnaanngilara ajugaanissamik periarfissaqartut, pissutigalugu aatsitassarsiorniat maani nunatsinni kikkulluunniit periarfissamik atuisarput taavalu nalunngilaat aallaqqaataaniilli itigartinneqarsinnaallutik. Neriorsorneqarneq ajorput aallaqqaataaniilli aallartinnissamik.

Mariane Paviasen KNR-imut taama oqarpoq.

Illua tungiliuttut aarleripput, Atassutip siulittaasua Aqqalu C. Jerimiassen nunatta milliardilikkaanik akiligassinneqarnissaanik ernumavoq.

- Uggornarujussuarpoq inuiaqatigiinnut eqqornerluissappat.

- Avillugu akilertariaqassooq tassa, nunarput naalagaaffillu.Taava kisianni tassanngaanniik innuttaasut pinngitsooratik eqqugaasussaassapput akilersorneqalissappat taama aningaasat annertutigisut.

Energy Transition Minerals Kuannersuarni aatsitassanik qaqutigoortuniik piiaasinnaanermik misissuileruttortoq Inatsisartunut qinersinissaq 2021-mi suaarutigineqarpoq.

Aatsitassanik qaqutigoortunik elektronikkinut atorneqartartunik piiaaniarneq ajornartorsiutitaqarpoq, piiagassammi uranimik akoqarput.  

Qineqqusaarnermilu uranimut akerliuneq sammineqaqaaq.

Inuit Ataqatigiit qinersinermi ajugaarujussuarput, siulittaasorlu Múte B. Egede oqarpoq, Inuit Ataqatigiinnik taasineq Kuannersuarni suliniummut akerliunermik taasinerusoq.

Qinersinermit qaammatit arfineq-pingasut qaangiummata, decembarimi 2021-mi uran pillugu inatsit atuutilerpoq.

Inatsillu Energy Transition Mineralsimut akorngutinngorpoq suliniutaammi ingerlaqqisinnaajunaarpoq.

Energy Transition Mineralsili isumaqarpoq aatsitassarsiorniarnermik suliani akuerineqarsinnaasoq, taamaammallu maanna Købehavnimi isumaqatigiissaasartunut nalilersuisitsinialerpoq.