Peruluttunut peqqissaasutut nunatsinni ilinniarsinnaaneq ammaanneqarpoq

Peruluttut suliaritissimasullu peqqissaasumit nunami allamiumit amerlanertigut isumagineqartarput. Tamanna allanngortinniarlugu peruluttunut peqqissaasutut ilinniarsinnaaneq nunatsinni periarfissaalerpoq
Allattoq Aviâja Kilime
septembarip 20-at 2017 16:29

Arnaq Fleischer Hansen 2002-mi Danmarkimi peruluttunut peqqissaasunngorpoq. Dronning Ingridip napparsimmavissuani peruluttut uninngavianni kalaallit peqqissaasut amigaataaneri ukiorpassuanngulersuni nalaattuartarpaa.

-Ulluinnarni napparsimasunik ilaqutaasunullu sullissinitsinni pingaaruteqartorujussuugami paaseqatigiissinnaanneq. Taanna uagut kalaallisut oqaluttuusugut malugisartorujussuuarput, Arnaq Fleischer Hansen oqarpoq.

Tamannalu allanngortinniarlugu ukiut pingasut matuma siorna ilinniarneq Dronning Ingridip Napparsimmaviani peruluttut uninngaviat ilinniarfittut atorneqarluni misiliutigineqarpoq.

-Tassalu peqqissaasut marluinnik oqaasillit Kalaallit Nunaanneersut ilinniartissinnaalissavagut. Najukkaminni kultuurertillu najorlugu ilinniassapput, taamaalilluta siunissami peruluttut uninngavianni peqqissaasoqalissalluta, uninngasut uninnganerannik taakkualu paaqqutarinerannik pitsaanerulersitsisumik, peqqissaasuuneq immikkoortortamilu peqqissaassutut pisortaasoq Jens Jørgen Lemvig oqarpoq.

Peqqissaasut immikkut ilinniarsimasut    

Nunatsinni peruluttunut peqqissaasut assaap illuinnaani kisinneqarsinnaapput, taamaammat peruluttunut peqqissaasunngorniarnerup nunatsinni ilinniarneqarsinnaalernera peqqissaasut qullersaqarfianiit nuannaarutigaat.

-Tassa ullumikkut avataaniit suliartortartut amerlapput. Aammalu una immikkut ilinniagaqarnerugami taamaattumik nunani allani taanna ilinniagaqartutut sulineq peqqissaasuuneq aamma amigaatigineqartarluni. Taamaattumik sivikitsumik sivisunerusumilluuniimmi maani sulisartut suliartortarput taavalu paarlakaaneq aamma annertooq ingerlasarluni, peqqissaasut pisortaat Ella Skifte oqarpoq.  

Ilinniagaq nunatsinnut nuunnera nuannaarutigineqarpoq  

Sinitsitsisartut, pilattaasarfimmi kiisalu peruluttut uninngavianni peqqissaasut katillugit 50-it tungaanoortut marluinnik oqaasillit pisariaqartinneqarput. 

Ilinniakkap nunatsinni ingerlanneqarsinnaalernera peruluttut uninngaviannit qilanaarineqarpoq.  
-Una ilinniartitsineq aallartinneqarnera uagutsinnut qujanartorujussuuvoq napparsimasuutitsinnut ilaqutaasunullu. Taamaalilluta immaqa sulinerput oqinnerulluni napparsimasullu tunngaviginerullugit ingerlasinnaavugut, Arnaq Fleischer Hansen naggasiivoq. 
Peruluttunik peqqissaasunngorniaq ataaseq juulip aallaqqaataani ilinniarluni aallartippoq. Ilinniarneq ukiunik marlunnik sivisussuseqarpoq, Ilisimatusarfiullu ataaniilluni.