Periarfeerunneqartup Prebenip ikinngutai ilaqutaalu akissarsititsiumapput

- Paasissutissiisinnaasunut 15.000 koruuninik akissarsititsiniarluta Prebenip ilaqutaalu isumaqatigiippugut, Preben Nielsenip ikinngutaa, Jens Jensen KNR-imut oqarpoq.

Aasianni amiisoq, Preben Nielsen, siorna aggustip 15-iani ullaassakkut kingullermik takuneqarpoq, scooterini uniarlugit Qaqqap Tunuani Killerpaanilu ingerlaartoq.

AAMMA ATUARUK Qalipaasoq Aasianni suli ujaarineqarpoq

Preben Nielsenip periarfeerunneqarneranut atatillugu, Aasianni politiit inunnik ataasiakkaanik suli apersuisarput. Naallu Preben Nielsenip periarfeerunneqarneranit ukioq ataaseq qaangiukkaluartoq, suli paasissutissanik atorsinnaasunik politiit paasisaqanngillat.

Suliap ilungersunartup naammassineqarnissaa kissaatigigaat

Preben Nielsenilli ilaqutai ikinngutaalu suli neriupput.

- Ikinngutitta Preben Nielsenip periarfeerunneqarneranut paasissutissanik iluaqutaasinnaasunik politiinut nalunaartut, 15.000 koruuninik akissarsitinneqarnissaat aalajangerparput. Tassami suliap tamassuma ilungersunartup naammassineqarnissaa erinigeqigatsigu pisariaqartillugulu, ingammik ilaqutaasut eqqarsaatigalugit, Jens Jensen taama oqarpoq.

Taassumalu qularinngilaa Preben Nielsenip periarfeerunneranut atatillugu Aasiammiut ilaat paasissutissanik peqassasut.

- Poltiit paasiniaanerminni ingerlariaqqissinnaajunnaaqqapput, taamaattumik uagut qanoq iliuuseqarnissarput politiinit kaammattuutigineqarpoq. Taamaattumik neriuppugut kinaluunniit paasussutissanik peqaruni nalunaarumaartoq, Aasianni amiisup Preben Nielsenip ikinngutaa, Jens Jensen taama oqarpoq.

AAMMA ATUARUK VIDEO Amiisup Prebenip periarfeerunneqarnera Aasianni ernummatigineqartoq

Assi © : Privat

^{Facebookimi allagarsiussaq. Asseq nammineq pigisaq.}