Partiit kattuffiillu Enoksenip sioorasaarinera akuersaanngikkaat

Kilisaatit anngiortumik ikiaroornartunik eqqussuinermi atorneqartassappata, Naalakkersuisut aalisarsinnaanermut akuersissutinik pisassanillu tunniussisarnerup sukateriffigineqarnissaanik sukaterissallutik siunniussaqarnerat, Demokraatit inatsiseqarnermut oqaaseqartartuata Michael Rosingip isornartorsiorpaa. 

- Naak pingaarnertut anguniagaq paasinaraluartoq, Kalaallit Nunaanni aanngajaarniutinik atornerluinerujussuup ajornartorsiuterpassuarnik pilersitsisarnera eqqarsaatigalugu, taamatut siorasaaruteqarneq
akuerineqarsinnaanngilluinnartoq isumaqarpunga, Michael Rosing tusagassiuutinut nalunaaruteqarluniullaaq manna allappoq.

Naalagaaffinni inatsisit tunngavigalugit naalakkersorneqartuni allat piliaannut akisussaatitsisoqarneq ajorpoq, Michael Rosing allappoq, nangillunilu:

Sullivimmi sulisoq sunngiffimmini pinerluttuliorpat sullivik pillarneqarsinnaanngilaq, nammineq pinerlunnissamut kajumissaarisimanngikkuni imaluunniit isiginngitsuusaarsimaguni, Demokraatineersoq Michael Rosing tusagassiuutinut nalunaarummi aallppoq.

AAMMA ATUARUK Aalisarsinnaanermut akuersissutinik tunniussisarneq ikiaroornartumik nassaartoqarnera pissutaalluni sukateriffigineqalerpoq

Atassummiit Hans Enoksenip oqariartuutaa isumaqatigineqanngilaq. 

- Inatsisinik unioqqutitsinaveersaarnissaq pisortat akisussaaffigivaat, namminersortuunngitsoq. Sulisitsisut pisinnaatitaanngillat sulisunik imaluunniit inigisanik misissuinissamut.

- Akitsuuserisut politiillu tassaapput oqartussat Kalaallit nunaanni aanngajaarniutinik eqqussinissamut pinaveersaartitsillutik suliniartussat eqqortut, Atassut tusagassiuutinut allappoq. 

KNAPK-p Enoksenip oqariartuutaa aamma tupaallaatigaa.

- Nalunngilarput umiarsuaatillit ikiaroornartumik nassarfigineqarnissartik kissaatiginngilluinnaraat, ilami akerlerimmassuk, aammami sillimaniarneq eqqarsaatigiinnaraanni ajorluinnartuummat. 

- Inuttat tatigalugit atorfinitsitat, tatigineqarnertik atornerlullugu anngiortumik eqqussuinermi peqataasut, ulluaq unnuarlu tamakkiisumik talinnganermi nakkutigineqarsinnanngimmata, KNAPK tusagassiuutinut allappoq.

Sulisitsisut aamma Enoksenip oqariartuutaa isumaqatiginagu allaaserisaqarnikuupput. Sulisitsisut Island aqqutigalugu anngiortumik eqqussuinissaq orniginarunnaartinniarlugu Islandimi oqartussat qanoq iliuuseqarsinnaanersut paasiniarpaat. 

AAMMA ATUARUK Angallatit Islandimi nakkutigineqarnerunissaat GE-p kissaatigaa