Aalisarsinnaanermut akuersissutinik tunniussisarneq ikiaroornartumik nassaartoqarnera pissutaalluni sukateriffigineqalerpoq

Islandimi politiit kalaallit kilisaataataanni Polar Nanumi ikiaroornartumik hashimik 20 kiilumik sapaatip akunnerani qaangiuttumi nassaarput.

Ikiaroornartumik nassaarneq Hans Enoksenip ilungersunartorujussuartut isigivaa. 

Kilisaammi ikiaroornartumik nassaartoqarnerata kingorna Hans Enoksenip umiarsuaatillit kilisaataatillu kaammattorpai inuttaminnut erseqqilluinnartunik malittarisassiuusseqqullugit, piumasarineqassalluni nunatsinnut umiarsuartigut ikiaroornartunik eqqussineq inerteqqutaalluinnarmat. 

Kilisaatit ikiaroornartumik eqqussuinermut atorneqaannassappata Naalakkersuisut aalisarsinnaanermut akuersissutinik pisassanillu tunniussisarnerinut siunissami kinguneqartitsisinnaapput. 

- Matumuuna erseqqissarusuppara aalisarsinnaanermut akuersissutit pisassiissutillu ikiaroornartunik assartuinissamut atugassanngorlugit pilersitaassanngimmata, Hans Enoksen erseqqissaavoq.

Pisassiisarnernullu akuersissutinillu tunniussisarnermut malittarisassanik sukaterisoqarniarnera, Sulisitsisut Peqatigiiffiata GE-p tusagassiuutinut nalunaarummi allaaserisaqarnerminni ilaatigut tupigusuutigaat.

- GE-p tungaanit akuerineqarsinnaanngitsutut isumaqarfigaarput, suliffeqarfik napaniutigisaminik qunusaarneqassappat aallavigalugu sulisuusup nammineq inatsisaatsumik ingerlatsinera, taamallu suliffeqarfik unioqutitsinertaqanngitsumik ingerlatsisoq pisumilu pisooqataanngilluinnartoq, pisumut pisooqataasutut akuliullugu, GE-p pisortaa Brian Buus Pedersen taama ilaatigut oqarpoq.

Ikiaroornartoq hash 20 kiilu Kalaallit Nunaanni tuniniarneqarpat  10 million koruuninik naleqarpoq.