Paragraf 37 atorlugu apeqquteqaateqarneq pingaartuusoq
Inatsisartunut ilaasortat Naalakkersuisunut paragraf 37 atorlugu apeqquteqarsinnaatitaanertik atorluarpaat, politikerillu 100-nit amerlanerusunik ukiup aallartinneraniit maannamut apeqquteqareerput.
Apeqquteqaateqarsinnaatitaaneq tamat oqartussaaqataanerannut pingaaruteqartoq, naalakkersuinikkut ingerlatsinermi ilisimasallip, Maria Ackrénip, oqaatigaa, politikerilli apeqquteqaateqannginnerminni allagaatigeriikkanik misissueqqaartarnissaannik nalinginnaasumillu paasisassarsioqqaartarnissaannik kaammattorpai.
Inatsisartunut ilaasortat 2017-imi apererusussuseqartorujussuusimammata, Namminersorlutik Oqartussat paragraf 37 atorlugu apeqquteqaatigineqarsimasut akineqarnissaannut ullut suliffiusut 176-it ukiortaamit maannamut atorpaat.
Inatsisartunut sakkoq pingaarutilik
Ilisimatusarfimmi inuiaqatigiilerinermi lektori, Maria Ackrén, naapertorlugu inatsisitigut apeqquteqaateqarsinnaatitaanermik aaqqissuussaq Danmarkimit Nunatta Inatsisartuinut eqqunneqarpoq, tamannalu tamat oqartussaaqataaneranni tunngaviusumik periaasiusoq, nunat allat inatsisartuini aamma atuuttoq.
- Tamat oqalliseqataasinnaanerannut pingaartuuvoq, Maria Ackrén oqarpoq.
AAMMA ATUARUK Inatsisartut Naalakkersuisunut apeqqarissaarput
Apeqqutit tamakkua Inatsisartut inuiaqatigiinnut attuumaassutilinnik sukumiinerusumik nassuiaanneqarnissaannut Naalakkersuisunillu ilisimatinneqarnissaannut sakkuusut pingaarutillit, Ackrén nassuiaavoq.
Partii Naleqqameersoq Anthon Frederiksen 56-inik siorna apeqquteqaateqarluni Inatsisartuni siorna apeqquteqaateqarnerpaavoq. Apeqqutillu akineqarnissaannut ullut suliffiusut 101,5-it atorneqarput, nutserisunullu 47.000 koruunit aningaasartuutaallutik.
Politikerit namminneerlutik
Frederiksenilli apeqqutaasa ilaasa akissutaat pisortat nittartagaanni takuneqarsinnaapput, soorlu aamma Google atorlugu apeqqutit ilaat ingerlaannaq akissutissarsineqarsinnaasut.
Maria Ackrénillu politikerit apeqqutiginiakkamik eqqarsaatigilluartarnissaannik kaammattorpai.
- Suunuku apeqqutigineqarniartut. Google atorlugu paasissutissat pissarsiarineqarsinnaappat? Maria Ackrén oqarpoq.
Politikerit apeqqutiginiakkatik akineqareersimanersut paasiniarlugit Inatsisartut allagaateqarfiannut misissuisarnissaannik, Maria Ackrén kaammattuivoq.
Politikerilli paragraf 37 atorlugu apeqquteqaatitik kisimiillutik killilersorsinnaagaat, Ackrén oqarpoq.
