Inatsisartut Naalakkersuisunut apeqqarissaarput
Namminersorlutik Oqartussanut paragraf 37 atorlugu apeqqutigineqartut qaammatini marlunni siullerni amerlangaatsiarput. Qaammatinimi januaarimi februaarimilu Inatsisartunit apeqquteqaatigineqartut katillugit 113-it nassiunneqareersimapput.
Tassalu apeqquteqaatit siorna nassiunneqartut pingasorarterutaannit amerlanerit maanna nassiunneqareerput.
Apeqqutillu akinissaat akikinngillat. Paragraf 37-imi atorlugu 2015-imi apeqquteqaammut akissuteqaaat naapertorlugu, apeqquteqaatit akissuteqarfiginissaat Namminersorlutik Oqartussanut, tassalu aamma akileraartartunut aningaasartuutaangaatsiartarput.
Akissuteqaammi 2015-imi nassiunneqartumi Naalakkersuisut siulittaasoqarfiat ilisimatitsivoq, Namminersorlutik Oqartussat apeqqummut ataatsimut akissuteqarniarnerminni agguaqatigiisillugu akunnerit aqqaneq marluk affarlu atortaraat, taakkulu saniatigut nutserinermut agguaqatigiisillugu 722 koruunit aningaasartuutigineqartarlutik.
Ullut suliffiit 176-it 81.000 koruunillu
Taamaasilluni Namminersorlutik Oqartussani sulisut 2017-imi qaammatini marlunni siullerni apeqquteqaatigineqartunut akissuteqarniarnerminni katillugit ullunut suliffiusunut 176-inut naatsorsuunneqarsinnaasut atoreersimalerpaat, taamatullu nutserinermut 81.000 koruunit atorneqareersimallutik.
Anthon Frederiksen 56-inik apeqquteqarluni Inatsisartuni ilaasortani siorna apeqquteqartuunerpaavoq. Tassalu taakkua akinissaannut ullut suliffiusut 101-it atorneqarsimassapput, taamatullu akissutinut nutserinermut 47.000 koruunit aningaasartuutaasimassallutik.
Anthon Frederiksen nammineq naapertorlugu, ilaatigut innuttaasut sinnerlugit taavalu Inatsisartunullu siunnersuuteqarnissamut tunngavissiorniarluni apeqquteqaateqartarpoq.
Anthon Frederiksenilli apeqqutaasa ilaannut akissutissat pisortat nittartagaanni ujaasinikkut nassaarilertorneqarsinaapput - allallu Google-ikkut ujaasinikkut toqqaannartumik nassaarineqarsinaallutik. Assersuutigalugu inuussutissarsiutiginagu aalisartut inuussutissarsiutigalugu aalisartutuulli umiatsiaarartaarnissamik qanoq periarfissaqarnersut pillugu apeqqutaa, nittartakkami nassaarineqarsinnaavoq.
Frederiksen: Tamat oqartussaanerat akisuvoq
- Tassami soorunami tamakkununnga immikkut teknikkikkut ilisimasaqaraanni tamakku (google) periarfissat atorneqarsinnaasarput. Kisianni aamma uani eqqarsaatigalugu taanna apeqquterpiaq pillugu tunuminngaanniit saaffigineqarnera pissutigalugu apeqqutiginikuuaara, Anthon Frederiksen oqarpoq.
Tamatut apeqquteqartarnini aningaasartornartuusoq miserratiginngilaa, aningasartuutilli taamaattut pisariaqartuusut, Anthon Frederiksen isumaqarpoq.
- Soorunami demokratiimik ingerlatsineq akisuvoq, aamma taanna inuiaqatigiinni akissaqartinneqartariaqarpoq. Tamatta kikkulluunniit inuit ammasumik sullikkusullugit neriorsuinikuuvugut. taamaammat taassuma akissaqartinnissaa pisariaqarpoq, Anthon Frederiksen oqarpoq.
