Nunarput Pan Am-ertoqarnerani nittarsaanniaraat
Nunatsinni Timersoqatigiit Kattuffianni, GIF-imi, Visit Greenlandimilu taama isumaqarput.
- Nunatta timersortartuisa pikkorinnersaat innuttaasunut nittarsaanneqartariaqarput. Nuannaartorinnilerneq isumallualernerlu pisinnaapput innuttaasunillu ataatsimoornerulersitsisinnaalluni. GIF-imi pisortaq, Carsten Olsen, taama isumaqarpoq.
- Nunatsinni ataqatigiinnerunissamik pisariaqartitsivugut, taamaammat ataatsimoorfigisinnaasatsinnik peqarnissaq pingaaruteqarpoq. Aaqqissuussinerillu peqataaffigisagut nunanit assigiinngitsunit peqataaffigineqartut tulluusimaarutigisarpagut, Carsten Olsen oqarpoq, nangillunilu;
- Pikkorissunik nunanut allanut unammisartuuteqarpugut, takussaanngillalli. Taamaammat pikkorissortagut meeqqanut inuusuttunullu takutissinnaaneq ajorpagut.
AAMMA ATUARUK Pan Am piviusunngussappat suli suliassaqaaluppoq
Amerikap nunavittaani assammik arsarluni unammersuarnerit Nunatta avammut nittarsaanneqarneranut iluaqutaasinnaasut, Visit Greenland isumaqarpoq. Unammersuarnernimi Nunarput nunanit allanit soorlu assersuutigalugit Argentinamit, Brasiliamit, Chilemillu maluginiarneqarnissaminut periarfissaqassaaq.
Isumaqanngilarli ukiup tulliani takornariaqarnerulissasugut. Nunatta takoqqusaarutiginissaa matumani pineqarpoq, Visit Greenlandimi pisortaq Anders Stenbakken oqarpoq.
- Saqqumilaarnissaq qitiuvoq. Soorlu Arctic Winter Gamesertoqarnerani Nunarput saqquminerulerpoq, Anders Stenbakken oqarpoq.
AAMMA ATUARUK Asii glæder sig til Pan Am i Nuuk
Nunatta pinngortitaa piorsarsimassusaalu Amerikap nunavittaani assammik arsarluni unammersuartoqarnerani Visit Greenlandimit nittarsaanniarneqarpoq.
- Misissussavarput nutaarsiassaqartitsiviit sorliit tikissanersut. Suullu allat periarfissaanersut. Assammik arsarneq pinngortitami piorsarsimassutsikkullu misigisassat ataqatigiilersillugit, Visit Greenlandimi pisortaq Anders Stenbakken oqarpoq.