GIF: Pan Am piviusunngussappat suli suliassaqaaluppoq
Pan Am Nunatsinni aaqqissuunneqassappat Nunatta piumasaqaatit assigiinngitsut naammassisinnaasariaqarpai. Tamannalu anguniarlugu kattuffiit pisortallu isumaqatigiinnialeruttorput. Assersuutigalugu Namminersorlutik Oqartussat Kommuneqarfik Sermersuullu aningaasaleeqataanissaat suli qularnaarneqarngitsoq, Kalaallit Nunaanni Timersoqatigiit Kattuffianni, GIF-imi, pisortaq oqarpoq.
- Aamma sulianik assigiinngitsunik, soorlu timmisartumik attartornissaq, unammiffissami nateq aalajangersimasoq atisaajartarfiillu naleqqussarnissaat suliassatsinni pingaarnersaapput, Carsten Olsen KNR-imut oqarpoq.
Pan Am-imik aaqqissuussinermut 17 millionit koruunit missingersuutigineqarput. Naallu Nunat tamalaat assammik arsarnermik kattuffiat, GIF, Elite Sport Greenland aamma Nunatsinni assammik artartartut kattuffiat, GHF, aningaasaleeqataaniaraluartut, pisortanit taperneqarnissaq pisariaqarpoq.
Taamaammallu GIF-ip GHF-i peqatigalugu Kommuneqarfik Sermersooq Namminersorlutillu Oqartussat isumaqatigiinniarfigai.
- Isumaqatigiinniarneq kigaappoq, sulilu qularnaarisoqarani. Pitsaasumilli oqaloqatigiinnikuuvugut, Carsten Olsen oqarpoq.
Pisortalli pissartanngorniuunnissanut tapersersuinerat qularutiginngikkaluarlugu qanoq tunuliaqutaatiginiarnersut ilisimassallugu piareersaanerup ingerlaqqinnissaanut pisariaqartikkitsik, Carsten Olsenip aamma oqaatigaa.
Qaquguli ingerlaqqittoqarsinnaanersoq kultureqarnermut naalakkersuisup, Doris Jakobsenip, oqaaseqarfigerusunngilaa, oqaatigaluguli aningaasanut inatsimmi timersornermut tapiissutissatut immikkoortinneqartut isumaqatigiinniarnermi sinaakkutaasut.
Aningaasalli amerlanerusut pisariaqartinneqassagaluarpata nalilersuiumaarluni, Jakobsen neriorsuivoq.
- Taakkua nalilersorneqarumaarput, pisariaqartitsineq annertuneruppat, taava aamma qaqeqqinneqarumaarpoq. Isumaqatiginninniarnerni taakku inissilluarneqarumaarput, Doris Jakobsen taama oqarpoq.
Pan Am-llu pinissaa qanilliartoraluartoq Carsten Olsen ernumanngilaq.
- Pissartanngorniuunnissaq AWG-tut angitiginngilaq piviusunngortinnissaanullu sanaartortoqartariaqarani.
Kalaallit Nunaanni Timersoqatigiit Kattuffianni pisortaq Carsten Olsen oqarpoq.
Kommuneqarfik Sermersooq Namminersorlutik Oqartussanut aningaasaleeqatigiinnissamik siunnersuummik decembarip qulingiluaanili nassiussisimasoq, akineqarnissamillu nukingisaarisimasoq kommunimi attaveqaqatigiinnermut pisortaq KNR-imut ilisimatitsivoq.
