Palle Jerimiassen Qaasuitsoq Avannarlermi borgmesterinngussaaq
Siumut Atassullu tusagassiorfinnut nalunaaruteqarlutik allapput partiit marluullutik suleqatigiinnissamik isumaqatigiissuteqarlutik borgmesterissamillu toqqaaasimallutik.
Siumumeersoq Palle Jerimiassen, Siumumi taaguunneqarnerpaasoq Qaasuitsoq Avannarlermi borgmesterinngussaaq.
Atassut borgmesterip tulliatut siullertut inissisimalissaaq aalisarnermullu piniarnermullu ataatsimiititaliami siulittaasuutitaqalerluni, tusagassiorfinnut nalunaarummi taama allapput.
Partiit marluusut isumaqatigiissutertik ullumi pingasunngornermi nalunaaqutaq aqqanermut saqqummiutissavaat.
Kommunalbestyrelsimi partiit allat marluk, Demokraatit Inuit Ataqatigiillu, Siumumut isumaqatigiinniarnerit pakatsissutigalugit nalunaarutigivaat, isumaqatigiissutigineqartorlu peqataaffiginagu. Taamaalillutillu ukiuni tulliuttuni sisamani illuatungiliuttuunissaminnut piareersimallutik allapput.