Palle Jerimiassen siulittaasutut sulilernissaminut qilanaarpoq
Kommunit katuuffiat, KANUKOKA, Kommuneqarfik Sermersuup aappaagu jannuaarip aallaqqaataanni kommunit kattuffiannit ilaasortaajunnaarniarnera pissutigalugu immikkut ittumik ullumi ataatsimiippoq. Ataatsimiinnermi siulittaasumik nutaamik qinersisoqarnissaa KANUKOKA-mi siulersuisut kissaatigaat, siulittaasoq, Martha Abelsen, Kommuneqarfik Sermersuup kommunalbestyrelsiani ilaasortaanera pissutigalugu.
Parteeqatiminut ajorsarpoq
Kommuneqarfik Sermersuup Martha Abelsen KANUKOKA-mi siulittaasuutiinnarniarlugu qineraluarpaa.
Katuffimmi qinersisinnaatitaasuni 15-iusunili Martha Abelsen tallimanit qinerneqarpoq. Qinersisinnaatitaasuni ataaseq qinerseqataanngilaq. Qinersinerulli inernera apeqquserneqarsinnaanngilaq.
Tassami politikerip ataatsip atini qulingiluariarluni taaneqartoq tusaasaqattaarpaa. Siumumi ilaasortaq, Palle Jerimiassen, Qaasuitsup Kommunianinngaanneersoq KANUKOKA-mi apriilip 14-ianinngaanniit siulittaasunngortussanngorpoq.
- Nuannaarpunga taamatut tatigineqarlunga qinerneqarama. Aamma suliassamut sassarnikuuvunga allanngueqataasinnaallunga misigisimagama. Taamaattoq pissanganartutut unammillernartutullu tiguara. Kisianni suliassaq qilanaaralugu, Palle Jerimiassen KNR-imut oqarpoq.
Sermersooq ilaasortaajunnaarniarpoq
Siulittaasutullu suliassani eqqarsaatigereerpai.
- Suliassaqangaatsiarpugut. KANUKOKA pissanganartumut piffimmut inissinnikuuvoq. Sermersooq ilaasortaajunnaaraluarpalluunniit KANUKOKA massakkut nutartertariaqarpoq, Palle Jerimiassen oqarpoq.
Siulittaasussap aamma oqaatigaa, kommuninik nalilersueqqinneq suliassaasoq angisooq.
Suliassaqangaatsiarneraraluarluni Palle Jerimiassen siulittaasutut sulilernissaminut qilanaarpoq.
Nunatsinni kommunit pingasut
Siulittaasussatut sassaraluartup aappaa Martha Abelsen naannerusumik oqaasissaqarpoq.
- Tusaatissatut tiguara, Martha Abelsen oqarpoq.
Kattuffiup ilaasortai, tassaasut kumuunit, 2009-mi kommunerujussuanngortitsisoqarnerata kingorna ikilinikuupput. Kommuneqarfik Sermersoorlu KANUKOKA-mit ilaasortaajunnaassappat ilaasortat pingasuinnanngussapput.
2009-ip kingorna KANUKOKA-mi siulittaasoq oqaaseqartartuujunnaarpoq, borgmesterillu ataatsimoorlutik oqaaseqartalerlutik.
KANUKOKA-mi ilaasortat oktobarip 27-anni ataatsimeersuassapput.