KNR Oqalutseqannginnera KNR-ip utoqqatsissutigaa
KNR-ip oqallinnermik aallakaatitassiaa Isummersorfik ippassaq siullermeerneqarpoq. Oqallinneq kalaalliusinnaq ingerlanneqarpoq taamaattumillu KNR2-kkut oqaluttut maliinnarlugit qallunaatut nutserneqartussaagaluarluni. Assigiinngitsut peqqutigalugit tamanna ajoraluartumik anguneqanngitsoorpoq.
Allattoq Aaqqissuisoqarfik / Redaktionen
apriilip 21-at 2017 13:38
Tamanna uggornaqaaq. Siunertaq uagullu pisussaaffipput soorunami tassaavoq, kikkulluunniit oqallinnermi malinnaasinnaanissaat suullu oqaatigineqarnerinik paasinninnissaat, nutaarsiassalerinermut pisortaq Mikkel Bjarnø taama oqarpoq.
Oqallinnerit allortarlugit kalaallisuinnaq ingerlanneqartassapput, tassanilu kikkulluunniit malinnaanissaat eqqarsaatigalugu soorunami nutserneqarnissaat pisariaqarpoq. Taamaattumik aallakaatitaareersoq nutserlugu allagartalissussavarput, taamatullu oqallinneq allagartalersugaq knr.gl-imut inissinneqassalluni, taanna neriorsuivoq.
