Oqaatsitigut ilinniartitaaneq pillugu oqallinneq naalakkersuisup nuannaarutigaa

- Atuarfiup naammassisussaavai meeraq ilinniaqqinnissaminut oqaatsit aporfiginagit, Nivi Olsen oqarpoq.

Ilinniartitaanerup pitsanngorsarnissaanut oqalliseqataarusuttunik angajoqqaaqartoq Radioaviisimit Nivi Olsen attavigigatsigu tamanna nuannaarutigalugu oqaatigaa. Naalakkersuisormi ataaseq kisimiilluni kivitsisinnaanngitsoq oqaatigalugu.

- Politikerip ataatsip una suliarisinnaanngilaa. Politikerit inatsisartuni kisimiillutik una suliarisinnaanngilaat.

- Oqaatigissavaralu nuannaarutigigakku Aviaaja Lyngep qisuariarnera. Eqqumalluni akisussaaffimmik tiguseqataalluni, piumasaqarluni suaaruteqarnera taanna assut nersualaarutigerusuppara. Angajoqqaallu amerlanerusut qisuariaateqartarnissaat kissaatigaara, Ilinniartitaanermut naalakkersuisoq Nivi Olsen taama oqarpoq.

Taassumali Aviaja Egede Lynge nersualaarpaa nammineq akisussaaffimmik tigusilluni panini tuluttut ilinniartinneqarnissaa aaqqissuuttarmagu. Kisiannilu aamma Nivi Olsenip ugguaraa atuarfeqarfinni oqaatsitigut ilinniartitaanerup appasippallaarnerata meeqqat immikkut atuartinneqartariaqarnerannik kinguneqartammat.

Atuarfiit inatsisinik malinnittussaapput

Atuarfiit ilinniartitsisulli assigiinngitsuupput, angusakinnermulli tamanna peqqutaasariaqanngilaq, Nivi Olsen oqarpoq.

- Ilinniartitaanermi inatsiseqarpoq malitassat, meeqqap ilikkagassaa, uani fageqarnermini ukua ilikkassavai. Tamakkua inatsisit malinneqartussaapput apeqqutaanani ilinniartitsisut suminngaanneerneri, Nivi Olsen oqarpoq.

Kalaallit inuusuttut meeqqat atuarfianni naammassisartut affai ingerlaqqinngitsoortartut qaqinnissai pisariaqarluinnartoq oqaatigaa. Meeqqat atuarfiisa massakkoqqissaaq attuumassuteqanngitsumik misissuiffigineqarput, Nivi Olsenillu taanna tigungajalerpaa, misissuataarnissaalu qilanaaraa:

- Taannalu misissuineq naammassissooq uani januarimi una qaammat. Takoriarukku suna tusiaffiginerlutigu, nalorninanngitsumik taavalu apeqquserneqarsinnaanngitsumik aaqqissuussinissara tullinnguuppoq, Nivi Olsen oqarpoq.

Taassumalu oqaatigaa, ajoraluartumik meeqqat atuarfianni uparuagassat arlaliusut misissuinerup inernerata imarissagaa.