Nuummi qinersisartut allaanerusumik ataatsimiitinneqartalissasut
Qinersinerni kingullerni marlussunni qinersisartunik ataatsimiititsinerit ornigarneqarpallaartarsimannginnerat tamatumunnga pissutaavoq. Tamannalu iliuuseqarfiginiarlugu Nuummi partiit aalajangerput.
- Taamaammat isumaqatigiippugut erfalasorpassuarnik ballonerpassuarnillu nassartarniarata, ataatsimiititsinerullu nalaani suaartartoqartannginnissaa kissaatigalutigu, Demokraatit Kitaani immikkoortortaqarfiani siulittaasoq, Tillie Martinussen, taama oqarpoq.
Aamma partiit illersuisui issiavinni saarlerni issiasut avaalaartartassanngillat, taamaaliornikkut ini ataatsimiiffiusoq nuannernerusoq innuttaasunit iserfigineqarsinnaaniassammat, Tillie Martinussen oqarpoq.
- Ataatsimiititsinerit tamarmik ataatsimiinnerni oqallinnernut aallaaviusussanik immikkut qulequtaqartassapput, Inuit Ataqatigiinneersoq Malene Lynge taama oqarpoq.
Ataatsimiititsinerit aallarnerlugit qinigassanngortittut imminut ilisaritillutillu pingaartitanik saqqummiuttassavaat. Tamatuma kingorna sassartut tamarmik oqallitsinneqartassapput.
Tamanna pereerpat qinigassanngortittut ininut assigiinngitsunut agguataarneqassapput, qinersisartullu init piumasaminnik alakkartarsinnaavaat qinigassanngortittullu toqqaannartumik aperisinnaallugit.
- Aaqqissuussineq nutaaq atuutilerpat neriuppugut qinersisartunik amerlanerujussuarnik ataatsimiititsinerit ornigarneqassasut, Siumumeersoq Peter Davidsen taama oqarpoq.
Maannamit qinersinissap tungaanut sisamanngornerit tamaasa qinersisartunik ataatsimiititsisoqartassaaq.
- Nuummi Qinersisartunik ataatsimiititsineq siulleq pissaaq marsip 16-iani nal. 19.00-imit 22.00-imut, Atassummeersoq Ove Frank Heilmann taama oqarpoq.