Nuummi bundgarnersorluni aalisarneq ukioq manna aallartiaarpoq
Aalisakkanik suliffeqarfissuaq nittartakkaminni taama allappoq.
Saarullinnik ukioq manna tunisisoqarluarnissaa Royal Greenlandip Nuummi tunisassiorfiata ingerlatsisuata isumalluarfigaa:
- Aap, bundgarnersorluni aalisarneq aallartilluarpoq. Aalisariutit marluk aalisariarnermi siullermi tamarmik immikkut 15 tonsit missingi tunivaat. Maannamut taakku aalisariutit saarulliit katillugit 56 tonsit tunereerpaat. Tunineqartut taakku siorna bundgarnersorluni aalisarnerup aallartinnerani tunineqartunit 20 tonsiusunit amerlaneroqaat, Royal Greenlandip tunisassiorfiata ingerlatsisua, Theo Didriksen oqarpoq.
Saarullinnik tunisassiorneq ingerlalluaannassappat sulisut piffissami aggersumi amerlineqassapput.
- Sulisut 20-t missaanik amerlassuseqartut aalajangersimasumik sulisorivagut. Saarullinnik tunisineq ingerlalluaannassappat aamma aalisariutit amerlanerusut uagutsinnut tunisisalissappata sulisut qulinik ilareernikuusagut piffissami aggersumi ilaqqissavagut, Theo Didriksen RG.gl-imut oqarpoq.
Pitsaassuseq qaffasinnerusoq
Bundgarnersorluni aalisarnerup siusissukkut aallartinnera aalisakkat pitsaassusaannut iluaqutaasoq, tunisassiorfiup ingerlatsisua oqarpoq:
- Saarulliit nunatta sineriaani ammassaqalinnginnerani pisarineqartartut qaffasinnerusumik pitsaassuseqartarput. Saarulliit ammassaqarnerata nalaani pisarineqartartut orsoqarnerujussuusarmata saarulllit orsoqarpallaartillugit tunisassiarineqartut nerpii pitsaassutsikkut appasittarput. Ammassaqalinnginneranili pisarineqartut pitsaasumik nerpeqartarmata qaffasinnersumik akeqartinneqartarput, Theo Didriksen oqarpoq.
Bundgarnersorluni saarullinniarluni aalisarneq qaammatini juunimi, juulimi aggustimilu annerusumik ingerlanneqartarpoq. Siorna qaammatit taakku ingerlanerini saarulliit 765 tonsit Nuummi Royal Greenlandip tunisassiorfianut tunineqarput, Royal Greenland taama paasissutissiivoq.
Aamma atuaruk Sikunnginnera aalisakkanik tunisassiornermut iluaqutaasoq
Aamma atuaruk Aalisarneq iluanaarutaavoq
