Nuuk Københavnimi metrot unittarfiannut atsiunneqalersoq
Københavnimi Nørrebromit Nørrebromulluunniit metromik ilaasut siunissami Nuuks Pladsiliartassapput.
Københavnimi metronut unittarfiit uiguisa pingajuat ukiuni arfineq-pingasuni sanaartorneqareerluni septembarip 29-anni ammassaaq.
Ullormiillu tassannga nunap ataatigoorluni illoqannginnersat Jagtvejip Rantzausgade/Borups Alléllu akornaniittut aqqutigineqarsinnaalissapput uanilu Nuuks Plads Stationimi niusoqarsinnaallunilu ikisoqarsinnaassaaq.
AAMMA ATUARUK Naalakkersuisut Naalagaaffillu isumaqatigiipput: Illersornissaqarfik Kangerlussuarmiiginnassaaq
Nunatsinni Nuummiit ilaasartaatinik angalasut Københavnimi Nuuks Pladsimut ingerlasinnaalissapput, tassami metrop aqqutaa Københavnip mittarfissuanit Kongens Nytorvimut atassuteqassaaq.
Aqqut nutaaq Cityringenimik taaguuteqarpoq, aqqutillu 15,5 kilometerinik isorartussuseqartup Nuuks Pladsimit metrot unittarfii 16-it Københavnimi metrot aqqutaanut immikkoortunut sisamanut agguataaqqusut atassuteqarfigissavai.
Københavnimi metrot aqqutaat uiguiaat sisamat pilersaarutaapput, uiguiaanilu kingulleq 2024-mi ammarnissaa naatsorsuutigineqarpoq. Københavnimi Metronut 2018-imi ilaasut 64 millioninut amerlipput.