Naalakkersuisut Naalagaaffillu isumaqatigiipput: Illersornissaqarfik Kangerlussuarmiiginnassaaq
Nunanut allanut tunngasunut naalakkersuisoq Ane Lone Bagger (S), attaveqaqatigiinnermut naalakkersuisoq Karl Frederik Danielsen (S) aamma illersornissamut ministeri Trine Bramsen (Socialdemokraatit) tunngaviusumik isumaqatigiissummik sapaatit akunneranni uani atsiugaqassapput. KNR taama paasisaqarpoq.
Isumaqatigiissutikkut Nuummi ilulissanilu nunani tamalaaneersunut 2023-mi mittarfissuaqalerpat Illersornissaqarfiup Kangerlussuarmi mittaffissuarmik atuiinnarnissaanik naalakkersuisut qallunaallu naalakkersuisuisa oqaloqatigiinnitik sinaakkusissavaat.
Suleqatigiissitaq kalaallinit qallunaanillu atorfilittalik Kangerlussuarmi augustip 25-ani naapeqatigiissimasut KNR-imit pingasunngormat oqaluttuaraarput. Taakku naalakkersuisut danskillu illersornissamut ministeriata atsioqatigiissutisssaat ilusilersorpaat.
AAMMA ATUARUK Danskit naalakkersuisuisa Kangerlussuaq ammatiinnarusuppaat
Kalaallit qallunaallu politikerii tunngaviusumik isumaqatigiissuteqarpata, suleqatissiitat Illersornisaqarfimmeersunik taavalu kommuniniit ilaasortaqartut sulinissaannut tunngavissat inississapput.
Kangerlussuup mittarfittut siunissaata qulakkeerniarneranik suliaq taamaalilluni nikeriaqqippoq.
- Kangerlussuup Mittarfia matuneqassanngitsoq Naalakkersuisuniit kissaatigineqarpoq, tamannalu sulinitsinni pingaarutilittut siunnerfigaarput, nunanut allanut tunngasunut naalakkersuisoq Ane Lone Bagger attaveqaqatigiinnermullu naalakkersuisoq Karl Frederik Danielsen tusagassiuutinut sisamanngormat nalunaarummi taama ilaatigut allapput.