ASSIT Nuuk innaallagiaaruttoq

Aqquserngit naapiffiini qulliit aqutsissutit, init taartut inuppassuillu aqqusinermi naapitassaapput. Nuuk Qinngorpumi attaveqaatitigut ajutooqqanerup nalaani marlunngornermi ualikkut akunnerup ataatsip missaani qamittooqqanermi ima isikkoqarpoq.

Illoqarfimmi qamittoortoqarmat Brugsenimi pisiniat pisiniarfimmiit aniatinneqartariaqarsimapput. Brugsnimi piniartitsisoq Jes Nyborg taama oqarpoq.

- Nipinik arlalinnik tusaaqalaariarluta aartuinnanngorpoq, ajutoortoqarneratigulli qaammaqquteqarpugut taakku erngerlutik ikipput. Akiliisitsisarfitsinni innaallagissamik piareersimasuuteqaratta minutsit qulit pisiniat kingulliit akiliiseriarlugit aniatittariaqarsimavagut. Taamami taartigitillugu maani isersimanissaq isumannaatsuunngilaq, Jes Nyborg oqarpoq.

Taassuma innaallagissat attaveerukkaangata Brugseni sulineq unittartoq oqaluttuaraa.

- Tassa sulisoq arlaannaalluunniit suliaqarsinnaajunnaartarpoq. Suliaqartarnigut amerlanerit qarasaasiaq elektronikkimulluunniit atortoq alla atorlugu ingerlasarput taamaaliorsinnaanngilagulli. Iffiorfeqarpugut, igaffeqarpugut neqaarniarfeqarlutalu taakkulu sulinermut atortorissaarutaat qaminngapput. Taamaammat innaallagissap ikeqqinnissaa uagutsinnut pingaartorujussuuvoq, Jes Nyborg oqarpoq.

Brugsenip silataani inuit naammagittarlutik pisiniarfiup ammaqqinnissaa utaqqivaat. Silataani tuniniaaveeqqat kalaaliminernik nioqquteqartut, innaallagiatortumik atortorissaaruteqartariaqanngitsut qamittoornerup nalaani immikkut soqutigineqarnerulaarput.

Kalaaliaqqami nutaami sulisut qulliit qaminnganeranni isikkamik arsarlutik imminnut aliikkusersorput.

GrønlandsBankenimi matut nammineq ammartartut qulliillu aamma qamittooqqapput. Sulisulli naneruuteeqqanik ikiterisimapput atuisartullu isertut piareersimaffigaat.

- Ajutooqqavinngilagut. Qarasaasiagut ikumapput nittartakkamullu attaveqarluta. Qulliit kisimik qamittoorput taakkununngalu taarsiullugu naneruutit atorpagut, Helle Mark, Nuummi Grønlandsbankimi sullissisoq oqarpoq.

Nalunaaqutaq 14:15-ip missaani innaallagiaq maani KNR-imi ikeqqippoq taamaammallu ilanngutassiaq una atuarsinnaavat. Nuummi innuttaasut tamarmik innaallagissamut attavineqqiliivinnissaat Nukissiorfiup naatsorsuutigaa.

Assit allat ilanngutassiap qulaani takusinnaavatit.